disa sekonda më parëMashtroi qytetarët për donacione në bujqësi dhe termine me viza, Prokuroria në Pejë i ngrit aktakuzë të pandehures
Periskopi(një orë më parë)
(një orë më parë)Prokuroria Themelore në Pejë ka ngritur aktakuzë ndaj Gj.M, nën dyshimin se njëjta ka mashtruar një numër qytetarësh përfitim donacionesh në bujqësi dhe për sigurim të tërmineve për viza.
Në njoftimin e prokurorisë, thuhet se e akuzuara gjatë viteve 2022-2024 është prezantuar rrejshëm si përfaqësuese e një organizate jo-qeveritare (OJQ), ku përmes mashtrimeve ka përfituar rreth 12 mijë euro.
“Sipas aktakuzës, e pandehura, në periudha të ndryshme kohore gjatë viteve 2022–2024, përmes paraqitjes së rreme të fakteve dhe duke u prezantuar si përfaqësuese e një organizate joqeveritare, ka mashtruar një numër të konsiderueshëm qytetarësh duke u premtuar përfitimin e donacioneve, përfshirë krerë gjedhësh, sera bujqësore dhe ndërmjetësim për sigurimin e termineve për viza, në këmbim të pagesave të ndryshme”, thuhet në njoftim.
“Sipas aktakuzës, me këto veprime e pandehura dyshohet se ka përfituar në mënyrë të kundërligjshme shumën e përgjithshme prej 11,650 (njëmbëdhjetë mijë e gjashtëqind e pesëdhjetë) euro”, vijon njoftimi.
Prokurori i Shtetit, me rastin e ngritjes së aktakuzës, i ka propozuar Gjykatës Themelore në Pejë që, pas mbajtjes së shqyrtimit gjyqësor dhe administrimit të provave, të pandehurën Gj.M ta shpallë fajtore për veprën penale që i vihet në barrë dhe ta dënojë sipas ligjit.
