Oda Ekonomike: Tregtia e Kosovës me Greqinë përmirësohet, deficitet vazhdojnë me Poloninë dhe Arabinë Saudite

Përmirësimi i bilancit tregtar me Greqinë shihet si sinjal pozitiv, i nxitur nga rritja e eksporteve dhe ulja e importeve, ndërsa zhvillimet me Poloninë dhe Arabinë Saudite tregojnë vazhdimësi të deficitit të lartë tregtar, thotè Oda Ekonomike.

Sipas Odës Ekonomike të Kosovës, këto të dhëna nënvizojnë nevojën për politika më aktive të mbështetjes së eksportit dhe diversifikimit të tregjeve, veçanërisht në drejtim të Polonisë dhe vendeve të Lindjes së Mesme.

Oda theksoi se rritja e konkurrueshmërisë së prodhimit vendor dhe forcimi i diplomacisë ekonomike mbeten kyçe për përmirësimin afatgjatë të bilancit tregtar të Kosovës.

Postimi i plotë:

Statistikat Tregtare të Kosovës | Tregtia e jashtme e mallrave me Greqinë, Poloninë dhe Arabinë Saudite (2025)

Të dhënat e Agjencisë së Statistikave të Kosovës (ASK) tregojnë se gjatë vitit 2025, raportet tregtare të Kosovës me këto tri tregje kanë ndjekur dinamika të ndryshme – nga përmirësimi i bilancit tregtar deri te zgjerimi i deficitit.

GREQIA

Kosova ka shënuar përmirësim të bilancit tregtar me Greqinë. Deficiti tregtar është zvogëluar në 269.5 milionë euro, krahasuar me 308.8 milionë euro në vitin 2024 (-12.7%).

Eksportet drejt Greqisë janë rritur ndjeshëm dhe kanë arritur në 9.5 milionë euro (+46.1%), ndërsa importet kanë rënë në 279.1 milionë euro (-11.5%).

Mbulueshmëria e importit nga eksporti është rritur nga 2.1% në 3.4%.

POLONIA

Ndryshe nga Greqia, shkëmbimet tregtare me Poloninë kanë regjistruar thellim të deficitit tregtar. Deficiti është rritur në 269.2 milionë euro, nga 205.7 milionë euro një vit më parë (+30.9%).

Eksportet kanë mbetur të ulëta në 3.5 milionë euro, ndërsa importet kanë arritur në 272.7 milionë euro.

Mbulueshmëria eksport/import mbetet vetëm 1.3%.

ARABIA SAUDITE

Tregtia me Arabinë Saudite ka shënuar përmirësim të lehtë të bilancit tregtar. Deficiti është zvogëluar në 182.1 milionë euro, nga 183.1 milionë euro në vitin 2024 (-0.6%).

Eksportet e Kosovës kanë mbetur pothuajse të pandryshuara në 1.5 milionë euro, ndërsa importet kanë arritur në 183.6 milionë euro.

Mbulueshmëria e importit nga eksporti mbetet 0.8%.

Çfarë tregojnë këto të dhëna?

• Greqia paraqet përmirësimin më të dukshëm të raportit tregtar përmes rritjes së eksporteve dhe uljes së importeve.

• Polonia mbetet një treg me potencial, por me hendek të madh tregtar në favor të importeve.

• Arabia Saudite vazhdon të dominohet nga importet, duke treguar hapësirë për zgjerimin e pranisë së produkteve kosovare në tregjet e Lindjes së Mesme.

Burimi: Agjencia e Statistikave të Kosovës (ASK)