5 minuta më parëKQZ tregon se kur do të shpallen rezultatet përfundimtare
Periskopi(një orë më parë)
(një orë më parë)Nëse gjithçka shkon sipas planit të Komisionit Qendror të Zgjedhjeve, deri më 26 qershor do të shpallen rezultatet përfundimtare të zgjedhjeve parlamentare që u mbajtën dje, tha zëdhënësi i KQZ-së, Valmir Elezi.
Ai tregoi për aktivitetet brenda qendrave të numërimit të votave deri te shpallja e rezultateve përfundimtare dhe për planin që e kanë miratuar në fillim të procesit zgjedhor.
“Sipas planifikimeve të vendosura nga ana e KQZ-së në planin e aktiviteteve të miratuara qysh në fillim të këtij procesi zgjedhor, në rast se nuk ka ankesa, shpallja e rezultateve përfundimtare planifikohet të bëhet deri më datën 26 qershor. Pra, ky është parashikim apo planifikim në planin operacional të aktiviteteve të KQZ-së”, tha ai.
Elezi tha se “certifikimi i rezultateve përfundimtare dhe njëkohësisht përmbyllja e procesit zgjedhor planifikohet të bëhet deri më datën 6 korrik”.
Zëdhënësi sqaroi se kjo mund të shtyhet përtej datave të planifikuara, varësisht nga ankesat e subjekteve politike dhe kandidatëve në Panelin Zgjedhor për Ankesa dhe Parashtresa, e më pas edhe në Gjykatën Supreme.
“Duhet ta sqarojmë se këto janë vetëm planifikme, sepse krejt kjo varet nga ecuria e aktiviteteve, dinamikës që zhvillohet në këto qendra. Gjithashtu, mes shpalljes së rezultateve përfundimtare dhe certifikimit ka një proces ankimor, i cili duhet të zhvillohet në institucione të ndryshme siç është PZAP dhe Gjykata Supreme”, tha ai.
