FIFA e ndryshoi ceremoninë e re para ndeshjeve, shkaku i Arabisë Saudite dhe flamurit të saj

Kupa e Botës 2026 në Amerikën e Veriut, e para me 48 kombëtare pjesëmarrëse, ka sjellë një sërë risish, përfshirë pushimet për hidratim, rregulla të reja të zbatuara nga arbitrat dhe një format krejtësisht të ri të ceremonisë para ndeshjes.

Siç është parë në çdo takim të turneut, të gjithë lojtarët mblidhen rreth rrethit qendror gjatë himneve kombëtare, ndërsa flamujt gjigantë të të dy vendeve shpalosen në fushë.

Megjithatë, në barazimin 1-1 mes Arabisë Saudite dhe Uruguait u vu re një ndryshim i dukshëm.

Edhe pse procedura e himneve ishte e njëjtë, flamujt u mbajtën të ngritur nga mbajtësit e tyre dhe nuk u vendosën mbi bar gjatë ceremonisë.

Shumë përdorues në rrjetet sociale e vunë re këtë ndryshim, por ekziston një arsye e qartë pse ceremonia u zhvillua ndryshe.

Flamuri i gjelbër i Arabisë Saudite përmban Shahadën – deklarimin e besimit në Islam.

Teksti i saj thotë: “Nuk ka zot tjetër përveç Allahut dhe Muhamedi është i Dërguari i Allahut”, dhe konsiderohet i shenjtë.

Për këtë arsye, flamuri trajtohet zakonisht me kujdes dhe respekt të veçantë, gjë që bëri që ai të mbahej i ngritur gjatë gjithë ceremonisë dhe të mos prekte tokën.

Për të ruajtur barazinë mes dy skuadrave, edhe flamuri i Uruguait u trajtua në të njëjtën mënyrë.

Për të njëjtën arsye, flamuri saudit nuk ulet kurrë në gjysmë shtize gjatë periudhave të zisë dhe nuk mund të shfaqet i përmbysur.

Gjithashtu, përdorimi komercial i tij është shumë i kufizuar dhe shpesh ka kundërshtime ndaj përdorimit të flamurit në topat e futbollit.

Arabia Saudite dhe Uruguai barazuan 1-1 në “Hard Rock Stadium” të Miamit, me golin e Abdulelah Al-Amrit që u barazua nga Maximiliano Araujo në minutën e 80-të.

Megjithatë, fundi i ndeshjes ishte i diskutueshëm, pasi arbitri e mbylli takimin para kohe gjatë kohës shtesë.

Loja vazhdoi përtej minutave të akorduara, me Uruguain në sulm, por kur Arabia Saudite nisi një kundërsulm dhe po afrohej minuta e tetë e shtesës, arbitri dha vërshëllimën përfundimtare.

Ndërkohë, Arabia Saudite duket se ka shkelur edhe një rregull të ri të FIFA-s gjatë ndeshjes.

Rreth minutës së 60-të, portieri Mohammed Al-Owais u shtri në fushë dhe mori trajtim mjekësor.

Ndërsa arbitri po kontrollonte gjendjen e tij, trajneri i Arabisë Saudite, Yorgos Donis, i dha udhëzime taktike njërit prej lojtarëve të tij.

Me këtë veprim, Arabia Saudite shkeli një rregull të ri që ndalon “pushimet taktike” kur portieri ndalet për shkak të një dëmtimi, një fenomen që ishte bërë problem i madh në Premier League.

Kryetari i Komitetit të Arbitrave të FIFA-s, Pierluigi Collina, kishte paralajmëruar para turneut: “Në seminaret me trajnerët e të 48 skuadrave, u kemi bërë të qartë se arbitrat do të jenë proaktivë. Ata nuk do të lejojnë që të dy ekipet të mblidhen pranë stolit kur portieri është i shtrirë në fushë për shkak të një dëmtimi”.

Megjithatë, edhe pse rregulli ndalon bisedat taktike në këto situata, arbitrat nuk kanë autoritet të japin ndonjë masë disiplinore për shkelje të tilla gjatë ndeshjes.