Shtëpia e Lamine Yamalit ishte cak i hajdutëve, pas kualifikimit në finale të Botërorit

Ngjarja ndodhi vetëm pak orë pasi 19-vjeçari ndihmoi Spanjën të siguronte një vend në finalen e Kupës së Botës, falë fitores 2-0 ndaj Francës.

Tentativa për grabitje ndodhi në shtëpinë e Yamalit në Esplugues de Llobregat, pranë Barcelonës, ndërsa futbollisti ndodhej mijëra kilometra larg, në Shtetet e Bashkuara, ku po merr pjesë në Kupën e Botës.

Sipas “Euro News”, ekipi privat i sigurisë së futbollistit dalloi përmes kamerave të sigurisë dy persona me kapuç, të cilët po përpiqeshin të kapërcenin murin rrethues të pronës.

Reagimi i shpejtë i rojeve i detyroi të dyshuarit të largoheshin menjëherë nga vendi i ngjarjes, pa arritur të hynin në banesë apo të merrnin sende me vlerë.

Menjëherë pas incidentit u njoftua policia katalanase, Mossos d’Esquadra.

Megjithëse të dyshuarit arritën të largoheshin para mbërritjes së policisë, autoritetet kanë nisur një hetim për identifikimin dhe kapjen e tyre.

Ekspertët e kriminalistikës po analizojnë pamjet e regjistruara nga sistemi i kamerave të vilës, me shpresën se provat do të ndihmojnë në identifikimin e autorëve.

Ky nuk është një rast i izoluar, pasi edhe disa prona të tjera në të njëjtën zonë rezidenciale janë vënë në shënjestër muajt e fundit.

Grupet kriminale të organizuara në Evropë vazhdojnë të synojnë banesat e futbollistëve profesionistë, duke ditur se në to shpesh ruhen sende luksoze me vlerë, si bizhuteri dhe ora të shtrenjta.

Yamal, i cili herë pas here ka publikuar në rrjetet sociale pamje nga jeta e tij private dhe disa prej sendeve luksoze që zotëron, thuhet se është bërë një objektiv për këto grupe kriminale.

Vjedhjet ose tentativat për grabitje në banesat e futbollistëve gjatë turneve të mëdha ndërkombëtare janë kthyer në një shqetësim në rritje, pasi autorët përfitojnë nga fakti që lojtarët ndodhen jashtë vendit me kombëtaret e tyre./ Periskopi/