Rodri i ankohet FIFA-s rreth trajtimit të Lamine Yamalit

Spanja regjistroi një fitore bindëse 2-0 ndaj Francës, e cila konsiderohej një nga favoritët para turneut, duke siguruar një finale të madhe ndaj fituesit të përballjes mes Anglisë dhe Argjentinës, që zhvillohet të dielën në New Jersey.

Penalltia e realizuar nga Mikel Oyarzabal në mesin e pjesës së parë i dha qetësi skuadrës së Luis de la Fuentes, ndërsa goli i Pedro Porrós në minutën e 60-të vulosi fitoren dhe triumfin e tretë radhazi të spanjollëve ndaj Francës.

Një nga protagonistët kryesorë të suksesit të “La Roja” ishte mesfushori i Manchester Cityt, Rodri, i cili dominoi mesin e fushës së bashku me Fabian Ruiz.

30-vjeçari kompletoi 87 për qind të pasimeve (58 nga 67), fitoi 11 duele dhe provoi edhe një herë pse konsiderohet ende një nga mesfushorët defensivë më të mirë në botë.

Megjithatë, ndërsa Rodri u vlerësua për paraqitjen e tij në Dallas Stadium në Arlington të Teksasit, ai nuk pati të njëjtin vlerësim për arbitrimin.

Gjatë gjithë turneut, arbitrat dhe sistemi VAR janë kritikuar për vendime të diskutueshme, ndërsa sipas Rodrit kjo situatë vazhdoi edhe në gjysmëfinalen ndaj Francës.

Mesfushori spanjoll theksoi se arbitri Ian Barton dhe ekipi i tij nuk bënë sa duhet për të mbrojtur talentin Lamine Yamal, i cili u ndal vazhdimisht me ndërhyrje të forta.

“Është e qartë. Kemi tre ndeshje që po përballemi me të njëjtën situatë. Ka pasur shumë faulle.

“Po flasim për 10 ose 15 raste kur ai djali (Lamine Yamal) përfundon në tokë. Nëse arbitrat nuk i akordojnë këto faulle, atëherë mbrojtësit do të vazhdojnë të bëjnë të njëjtën gjë.

“Toleranca ndaj këtyre ndërhyrjeve është e dukshme dhe sot ishte edhe më e qartë. Megjithatë, ai zhvilloi një ndeshje të shkëlqyer”, deklaroi Rodri.

Shpejtësia e reagimit të Yamalit bëri që ai të fitonte penalltinë ndaj Francës, pasi Lucas Digne gaboi në vlerësimin e topit dhe e goditi 19-vjeçarin gjatë tentativës për largim.

Me një fitore në finale, Yamal mund të bëhet fituesi i pestë më i ri në historinë e Kupës së Botës, duke kaluar brazilianin Marco Antonio.

Edhe Rodri mund të shkruajë historinë.

Kushdo që fiton gjysmëfinalen mes Anglisë dhe Argjentinës do të ketë një sfidë shumë të vështirë përballë Spanjës.

Skuadra e Luis de la Fuentes mund t’i shkaktojë një tjetër zhgënjim Anglisë, pasi e mposhti në finalen e Euro 2024, ose të ndalë Argjentinën të fitojë dy Kupa Bote radhazi.

Për Rodrin, finalja paraqet edhe një mundësi për t’u bashkuar me një grup legjendar futbollistësh që kanë fituar Kupën e Botës, Ligën e Kampionëve (ose Kupën Evropiane) dhe Topin e Artë.

Rodri e fitoi Topin e Artë në vitin 2024 pas sezonit historik të Manchester Cityt, ndërsa deri më tani vetëm 10 futbollistë kanë arritur këtë “triple crown”:

1. Franz Beckenbauer (Gjermani)
2. Bobby Charlton (Angli)
3. Gerd Müller (Gjermani)
4. Paolo Rossi (Itali)
5. Zinedine Zidane (Francë)
6. Rivaldo (Brazil)
7. Ronaldinho (Brazil)
8. Kaká (Brazil)
9. Lionel Messi (Argjentinë)
10. Ousmane Dembélé (Francë)

Finalja e Kupës së Botës i jep Rodrit mundësinë të bëhet futbollisti i parë spanjoll që i bashkohet këtij grupi elitar, një motivim shtesë për të udhëhequr Spanjën drejt titullit botëror.