Spanja fiton avantazh të rëndësishëm para finales së Botërorit

Spanja u bë kombëtarja e parë që siguroi një vend në finalen e Kupës së Botës 2026 dhe do të ketë një avantazh të rëndësishëm përpara ndeshjes vendimtare të së dielës.

“La Roja” u kualifikua në finalen e parë të Botërorit që nga triumfi i vitit 2010, pasi mposhti Francën në gjysmëfinalen e zhvilluar në Arlington të Teksasit.

Golat e Mikel Oyarzabal dhe Pedro Porro i dhanë fitoren skuadrës së Luis de la Fuente, e cila tashmë do të kërkojë ta pasojë suksesin në Kampionatin Evropian 2024 me një tjetër trofe të madh.

Finalja do të zhvillohet të dielën në stadiumin “MetLife” në New Jersey, ndërsa Franca do të luajë një ditë më herët në Miami në ndeshjen për vendin e tretë.

Nëse Anglia e mposht Argjentinën në gjysmëfinalen tjetër, finalja do të jetë një përsëritje e duelit të Evropianit të vitit 2024.

Megjithatë, Spanja do të hyjë në atë përballje me një avantazh të dukshëm ndaj Anglisë ose Argjentinës: një ditë më shumë pushim dhe rikuperim.

Statistika favorizon skuadrën që pushon më gjatë

Një analizë e detajuar e publikuar nga “The Athletic” tregon se orari i gjysmëfinaleve ka ndikuar shpesh në rezultatin e finaleve të turneve të mëdha.

Në 13 nga 14 finalet e fundit të Kupave të Botës dhe Kampionateve Evropiane, skuadra që kishte më shumë kohë për pushim para finales e fitoi trofeun.

Në Evropianin e vitit 2012, Spanja e zhvilloi gjysmëfinalen një ditë përpara Italisë dhe më pas e dominoi finalen, duke fituar 4-0.

Katër vjet më vonë, Portugalia kishte më shumë kohë për t’u rikuperuar se Franca përpara finales së Evropianit 2016 dhe arriti ta fitonte trofeun pas vazhdimeve.

Një situatë e ngjashme ndodhi edhe në Kupën e Botës 2022 në Katar, kur Argjentina e zhvilloi gjysmëfinalen një ditë përpara Francës dhe më pas u shpall kampione e botës.

Një nga përjashtimet ishte finalja e Kampionatit Evropian të femrave në vitin 2017, kur Holanda mposhti Danimarkën 4-2.

Megjithëse holandezet kishin luajtur në gjysmëfinalen e dytë, të dyja ndeshjet gjysmëfinale ishin zhvilluar në të njëjtën ditë, prandaj asnjëra skuadër nuk kishte përfituar një ditë shtesë pushimi.

Rasti i fundit kur skuadra me më pak kohë për rikuperim arriti ta fitonte finalen e një turneu të madh për meshkuj ishte Spanja në Kupën e Botës 2010.

Spanjollët luajtën në gjysmëfinalen e dytë, por megjithatë e mposhtën Holandën në finale falë golit të Andres Iniestas në vazhdime.

Nxehtësia mund ta bëjë pushimin edhe më të rëndësishëm

Koha shtesë për pushim mund të ketë rëndësi të veçantë në Botërorin e këtij viti, për shkak të temperaturave të larta dhe kushteve të vështira në Amerikën e Veriut.

Anglia dhe Argjentina do ta zhvillojnë gjysmëfinalen e tyre një ditë pas Spanjës, duke pasur më pak kohë për t’u rikuperuar fizikisht dhe për ta përgatitur taktikisht finalen.

Nëse ndeshja mes tyre shkon në vazhdime, lodhja mund të bëhet edhe më e madhe.

Spanja, në anën tjetër, do të ketë mundësi të pushojë, të analizojë kundërshtarin dhe të përgatitet për finalen pa presionin e një gjysmëfinaleje të luajtur vetëm pak ditë më parë.

Një ditë pushimi mund të mos duket vendimtare, por historia e turneve të fundit tregon se në nivelet më të larta, pikërisht detaje të tilla mund ta përcaktojnë fituesin e trofeut.