8 minuta më parë“Familja pagoi 2,800 euro për t’i sjellë trupat në Kosovë”, Koci ngre disa pyetje për aksidentin tragjik në Shkup
Periskopi(një orë më parë)
(një orë më parë)Avokati Arianit Koci, ka marrë përsipër përfaqësimin e familjeve të tre personave që humbën jetën në aksidentin tragjik në segmentin e autostradës Shkup–Bllacë, duke ngritur një sërë pyetjesh për mënyrën se si ishte siguruar rruga dhe duke kërkuar që përgjegjësit të dalin para drejtësisë.
Përmes një reagimi në Facebook, Koci bëri të ditur se, së bashku me familjarët e viktimave, ka vizituar Policinë e Maqedonisë së Veriut, por tha se nuk ka marrë përgjigje për çështje që i cilëson thelbësore për zbardhjen e rastit.
“Cila ndërmarrje e ka ndërtuar këtë segment? Kush e ka mbikëqyrur ndërtimin dhe kush ka qenë përgjegjës për sigurimin e tij? Pse hyrja në segmentin që zyrtarisht ishte i mbyllur për qarkullim nuk ka qenë e bllokuar fizikisht?”, ka pyetur Koci.
Sipas tij, një tjetër fakt që ngre pikëpyetje është se vetëm pas aksidentit fatal hyrja në këtë segment është bllokuar fizikisht me zhavorr dhe janë vendosur shenja të komunikacionit.
“Nëse këto masa u morën pas aksidentit, pse nuk ishin vendosur më herët, kur segmenti ishte i mbyllur zyrtarisht për qarkullim?”, ka theksuar ai.
Avokati shtoi se deri tani nuk ka informacion nëse është ndaluar apo është marrë në pyetje ndonjë person në lidhje me përgjegjësinë për këtë rast.
Në reagimin e tij, Koci ngriti edhe çështjen e kostove që, sipas tij, janë përballuar nga familjarët e viktimave pas tragjedisë.
“Familjarët janë detyruar të paguajnë 2,800 euro për bartjen e kufomave nga Maqedonia e Veriut në Kosovë. Së paku këtë shpenzim është dashur ta marrë përsipër shteti”, ka shkruar ai.
Koci ka bërë të ditur se do të angazhohet në përfaqësimin ligjor të familjeve të viktimave, ndërsa ka kërkuar zbardhjen e plotë të rrethanave të aksidentit dhe përcaktimin e përgjegjësisë institucionale për rastin.
