Zgjedhjet e brendshme në PDK: Detaje çka pritet të ndodh

Menjëherë pas shpalljes së rezultatve të zgjedhjeve të 28 dhjetorit, Partia Demokratike e Kosovës e cila doli e dyta me 20.98 % ka nisur përgatitjet për zgjedhjet e brendshme. Kryetari i PDK, Bedri Hamza, i cili ishte shprehur se nuk është i kënaqur me rezultatin, po e sheh të nevojshme mbajtjen e një procesi të brendshëm që sipas tij “do ta forcojë partinë”, shkruan Periskopi.

Pse do të mbahen zgjedhjet e brendshme në PDK dhe çka përfshijnë ato?

Partia Demokratike e Kosovës ka vendosur të hyjë në një fazë të re riorganizimi dhe kjo do të nis me përgatitjen për zgjedhjet e brendshme, proces që pritet të zgjasë deri 9 muaj.

Betim Gjoshi nga PDK ka thënë se ku është një cikël zgjedhor i cili do të nis nga nëndegët, degët e deri te zgjedhja e kryetarit të partisë.

“Është cikel i ri zgjedhor, duke nisur nga nëndeget, degët dhe deri kryetari i partisë. Ky proces i brendshëm zgjedhor në PDK do të zgjasë përafërsisht 9 muaj, deri në thirrjen e Konventes, ku zgjedhjet e brendshme përfshijnë edhe kryetarin e PDK i cili në konvente do të vendosë nëse do të qendroj kryetar i PDK”, tha Betim Gjoshi për Periskopin.

Çka deklaroi Bedri Hamza?

Kryetari i PDK-së Bedri Hamza dje ka mbledhur kryetarët e degëve me të cilët ka diskutuar për këtë proces.

“PDK-ja po hyn në një fazë të re riorganizimi. Zgjedhjet e brendshme, për të cilat sot diskutova edhe me kryetarët e degëve, janë hap i domosdoshëm për forcimin e PDK-së. Ne synojmë më shumë, sepse Kosova ka nevojë për më shumë. Ka nevojë edhe për një PDK më të fortë, më të hapur dhe më të organizuar. Kjo kërkon punë të vazhdueshme, degë aktive dhe hapësirë më të madhe për të rinjtë, në çdo nivel të partisë.
Kjo është rruga për një PDK më afër qytetarëve dhe gjithnjë në shërbim të Kosovës”, shkroi dje Hamza në Facebook.

Kujtojmë se me 17 nëntor, PDK kishte mbajtur Konvetën e partisë, në të cilën Bedri Hamza u zgjodh kryetar i ri i Partisë Demokratike të Kosovës.
Hamza u zgjodh përmes votimit të hapur dhe për të nuk kishte vota kundër.

Ai nuk kishte kundërkandidat dhe zgjedhja e tij u bë pasi Memli Krasniqi dha dorëheqje nga kreu i partisë.

Krasniqi ka qenë pjesë e PDK-së për gati dy dekada, fillimisht si kryetar i të rinjve të partisë e më pas nënkryetar i partisë para se të zgjidhej kryetar më 2021.

Nën udhëheqjen e Memli Krasniqit, PDK-ja përveç që doli e dyta në zgjedhje nacionale, ajo i fitoi gjashtë komuna në zgjedhje lokale të 2025, duke pësuar një rënie të vogël në nivel lokal, në krahasim me zgjedhjet paraprake./Periskopi

ZYRTARE: Pas 5 viteve, Memli Krasniqi jep dorëheqje nga PDK’së