SKANDAL: 10 milionë euro dyshohet se janë zhdukur në ministrinë e Rozeta Hajdarit – ishin destinuar për rezervat e shtetit

Një shumë prej rreth 10 milionë euro që të shtetit të Kosovës, që ishin destinuar për blerjen e produkteve për rezervat e shtetit – siç raporton Insajderi – dyshohet se janë avulluar.

Sipas mediumit të njohur, që thirret nga burime të mirinformuara brenda Ministrisë së Industrisë, Ndërmarrësisë dhe Tregtisë, të udhëhequr nga zonja Hajdari, malli që është blerë për rezerva nuk ka arritur në Kosovë, ndërsa kompania prej të cilët është blerë malli që duhej të shkonte në rezerva ‘është zhdukur’.

“Dyshohet se zyrtarët e MINT-it kanë blerë grurin për rezervat shtetërore, e kanë paguar mallin që do të duhej të arrinte në Kosovës sipas marrëveshjes por se një gjë e tillë nuk ka ndodhur. Malli dhe paratë janë zhdukur”, shkruan Insajderi.

Mediumi ka provuar të gjitha rrugët profesionale për ta vërtetuar informacionin (i ka dërguar pyetje Ministrisë, ka kërkuar qasje në dokumente dhe faturat që dëshmojnë blerjet), por asnjërën prej tyre nuk ka arritur ta ketë.

Ministrja Hajdari gjatë kësaj jave ka qenë për raportim në Kuvend lidhur me rezervat shtetërore. Raportimi i saj para komisionit për Ekonomi ka qenë i mbyllur për publikun. Nuk janë lejuar gazetarët që të marrin pjesë në këtë raportim, me arsyetimin se ka sekrete shtetërore.

Kujtojmë se Qeveria e Kosovës në një nga mbledhjet e saj kishte ndarë dhjetë milionë euro për rezervën shtetërore, që është në kuadër të MINT-it.

“Qeveria është duke u siguruar që të përkrah sektorin e bujqësisë si është më së miri e më sigurt. Kemi aplikuar në programin për bujqësi për grantin prej 20 milionë eurosh për fermerët e vegjël. Do të kemi së paku edhe 10 milionë euro për rezerva shtetërore, që mund të mbushen me prodhime vendore”, pati thënë Kurti.