Çka nënkupton politikisht vendimi i Gjykatës Kushtetuese për Vetëvendosjen?

Sipas këtij vendimi, Gjykata Kushtetuese e konsideron plotësisht në përputhje me Kushtetutën e Kosovës vendimin e Thaçit për të mandatuar z.Hoti për kryeministër të ri të Qeverisë.

Por, ky vendim jep sqarimin e duhur edhe sesi duhet vepruar në zgjedhjet e ardhshme.

LDK vazhdimisht ishte ankuar se Vetëvendosje e kishte trajtuar në mënyrë të padrejtë si partner qeveritar. Në fakt, kjo parti kishte pasur të njëjtën ankesë edhe ndaj PDK-së gjatë kohës së bashkëqeverisjes me të.

Por, çka kishin të përbashkët Vetëvendosje e sotme me PDK-në e mëhershme? Dolën të parat në zgjedhje.

Përmes këtij vendimi, Gjykata Kushtetuese i heq mundësinë partisë së parë që t’i mbajë nën kontroll dhe të shantazhojë partitë në bashkëqeverisje me rrëzim të Qeverisë, shkruan Periskopi.

Në këtë formë, votuesit e secilës parti parlamentare shqiptare arrijnë të fitojnë barabarësi me njëri-tjetrin në formën e përfaqësimit të tyre. Partia e parë parlamentare e ka të drejtën ekskluzive të propozimit të kryetarit/kryetares së Kuvendit, por gjithçka tjetër është në diskutim për marrëveshje në proporcion me përfaqësimin parlamentare.

Në rrethanat aktuale, ky vendim nënkupton se partitë e para (e në këtë rast Vetëvendosje) duhet të respektojë marrëveshjet për bashkëqeverisje ndaj partnerit qeveritar. Z.Kurti dhe partia e tij duhet domosdo të arrijnë marrëveshje me një parti tjetër parlamentare në rast se nuk fitojnë më shumë se 61 deputetë.

Kujtojmë se Vetëvendosje e kishte shkelur marrëveshjen për bashkëqeverisje me LDK-në duke shkarkuar Agim Veliun megjithëse ajo marrëveshje e ndalonte një veprim të tillë./Periskopi