Këshilltari i Haradinajt e konfirmon se kryeministri ende nuk e ka marrë vizën britanike

Në një publikim në rrjetin social “Facebook”, Arifi bëri të ditur se kryeministri Haradinaj është ende në proces të marrjes së vizës britanike.

“Informata e rrejshme e Kohës Ditore për vizën e Kryeministrit është shprehje e urrejtjes patologjike dhe tradicionale që keta njerēz kanē ndaj zotit Haradinaj. Shpreh keqardhje që ne nuk mund të ju shërojmë. Ne mundem të ju japim informacione të sakta por për shërim shkoni diku tjetër”, ka shkruar Arifi në profilin e tij në rrjetin social “Facebook”.

Një qytetar i ka reaguar Arifit në këtë publikim dhe ka kërkuar nga ai që t’ua argumentojë qytetarëve se është ndryshe.

“Sa ka apliku. Është në proces”, i është përgjigjur shkurt Arifi.

Ndryshe, Koha Ditore raportoi se sot se Haradinaj rrezikon që të mos marrë pjesë fare në një konferencë për investime e organizuar për shtetet e Ballkanit Perëndimor, e cila do të mbahet më 26 shkurt në Britani.

Për këtë çështje, Zyra e Kryeministrit nuk ka dhënë përgjigje zyrtare, ndërsa Ambasada e Britanisë në Kosovës ka refuzuar të flas, me arsyetimin se nuk e praktikojnë të japin detaje për aplikime individuale për viza.

Haradinaj së fundmi është pajisur me pasaportë të Shqipërisë, që i mundëson të lëvizë pa vizë në shtetet e Zonës Shengen, por jo edhe në Britani, pasi kjo e fundit nuk është anëtare e kësaj zone.

Ky izolim i kryeministrit kosovar duket se vjen pas mbështetjes që Haradinaj dhe presidenti Hashim Thaçi i kishin dhënë iniciativës për shfuqizimin e Gjykatës Speciale.

Të ashpër kundrejt nismës së deputetëve për shfuqizimin e Speciales kanë qenë ambasadorët e vendeve mike, të cilët kanë paralajmëruar pasoja të rënda për lidershipin kosovar, nëse ndodh një gjë e tillë.

Javë më parë u raportua se Haradinajt i është refuzuar viza edhe Ambasada Amerikane në Prishtinë. /Periskopi