Deputeti i PDK-së: Albin Kurti e përdor flamurin kombëtar si kartëmonedhë politike

Andin Hoti, djali i intelektualit shqiptar, Ukshin Hoti, ka shkruar në llogarinë e tij në Facebook se Albin Kurti, iku nga flamuri kombëtarë kur u desh më së shumti ta mbrojë atë, njofton Klan Kosova.

Hoti që tani është pjesë e PDK-së, përmes llogarisë së tij në Facebook, ka shkruar se Kurti kishte refuzuar të armatosej e të luftonte për vendin dhe flamurin kombëtar.

Ky është postimi i plotë i Hotit në Facebook:

Flamuri kombëtar është simboli më i shenjtë i historisë tonë të lavdishme dhe nuk është e lavdishme që ai të përdoret si kartëmonedhë politike.

Albin Kurti e ka trajtuar gjithmonë si të tillë flamurin, duke manipuluar me ndjenjat e qytetarëve.

Flamuri mbrohet deri në flijim kur është në rrezik, kurse në liri dashuria dhe respekti për të manifestohet me angazhim dhe përkushtim ndaj interesave të vendit.

Albin Kurti kishte ikur nga flamuri kombëtar kur duhej ta mbronte atë, ndërsa tani e mban në xhep për ta përdorur sa herë t’i duhet për kalkulimet e tij politike.

Albin Kurti kishte refuzuar të merrte armën për ta mbrojtur vendin dhe flamurin, ndërsa sot krekoset paturpësisht, duke keqpërdorur procesin politik nëpër të cilin po kalojmë.

Kosova është shtet i të gjithë qytetarëve të saj dhe të zgjedhurit e popullit, sidomos ata që po e keqpërdorin flamurin kombëtar për spektakël mediatik, duhet ta dinë se Republika e Kosovës nuk është themeluar për inat të të tjerëve, siç ka thënë Babai im.