Çitaku i përgjigjet Daçiqit, i cili tha se Çitaku është shqiptare – jo kosovare

Ambasadorja e Kosovës në SHBA, Vlora Çitaku është duke debatuar në Këshillin e Sigurimit të Organizatës së Kombeve të Bashkuara kundër ministrit të jashtëm serb, Ivica Daçiq me rastin e paraqitjes së Raportit për Kosovën.

Çitaku i është kundërpërgjigjur edhe deklaratave të Daçiq të bëra më herët, kur tha se Çitaku është shqiptare dhe jo kosovare, shkruan Periskopi.

Çitaku pyeti Daçiqin nëse duhet të shkojë në Shqipëri meqë është shqiptare, duke shtruar argumentin se shqiptarët jetojnë me shekuj në Ballkan dhe se Kosova është shtet i të gjithëve.

“E kam dëgjuar këtë, dhe ka pasur një operacion të tërë të deportimit se ka pasur shqiptar.  A i bjen kjo që unë duhet të shkojë në Shqipëri, apo si? Kosova është shtet dhe i përket të gjithë komuniteteve. Askush më nuk mund të më thotë se pasi qenkesha shqiptare nuk meritoj të jetoj aty. Kemi jetuar aty me shekuj. Po të shkoni aty ka shumë libra që tregojnë historinë e shqiptarëve në Ballkan”, tha ajo, shkruan Periskopi.

Çitaku po ashtu përmendi edhe komandantët e UÇK-së, Sami Lushtakun e Ramush Haradinajn, të cilët kanë qenë subjekt akuzash për krime lufte, me aktakuza të iniciuara nga Serbia.

Ajo tha se që të dy janë çlirimtarë dhe se kanë luftuar përpara oborrit të tyre.

“Sami Lushtaku he Ramush Haradinaj kanë luftuar në oborrin e tyre, para shtëpisë së tyre me qëllim të mbrojtjes dhe çlirimit të një kombi”, tha ajo.

Sipas asaj që tha Çitaku, Serbia duhet të përballet me të kaluarën e vet, jo vetëm për Kosovën.

“Kosova e ka rrugën e vet dhe të ardhmen e saj. Serbia duhet të përballet me të kaluarën e vet, mu për shkak të së ardhmës se vet”, tha ajo. /Periskopi/