4 minuta më parëPlagosja në Tiranë, tre të arrestuar dhe një 17-vjeçar në kërkim
Periskopi(2 orë më parë)
(2 orë më parë)Policia e Tiranës ka zbardhur ngjarjen e ndodhur mbrëmjen e djeshme në rrugën “Frosina Plaku”, ku disa persona u përfshinë në një konflikt fizik me sende të forta, ndërsa njëri prej tyre dyshohet se përdori edhe thikë.
Sipas njoftimit zyrtar të Policisë së Shtetit, ngjarja ndodhi në hyrjen e një parkimi të një ndërtese, ku pas marrjes së informacionit, Seksioni për Hetimin e Krimeve të Rënda, në bashkëpunim me Komisariatin e Policisë Nr. 2, nisën menjëherë hetimet për zbardhjen e rrethanave dhe identifikimin e personave të përfshirë.
Si rezultat i veprimeve hetimore, policia ka arrestuar në flagrancë tre persona, L. N., 46 vjeç, A. L., 44 vjeç dhe E. K., 23 vjeç. Ata dyshohen për veprën penale “Plagosja e rëndë me dashje”.
Ndërkohë, një tjetër person, A. I., 33 vjeç, është proceduar penalisht në gjendje të lirë, pasi ndodhet në spital nën kujdesin e mjekëve.
Policia ka shpallur në kërkim edhe E. L., 17 vjeç, i dyshuar për veprat penale “Plagosja e rëndë me dashje”, kryer në bashkëpunim, si dhe “Prodhimi, mbajtja, blerja apo shitja pa leje e armëve të ftohta”.
Uniformat blu bëjnë me dije se vijon puna për kapjen e 17-vjeçarit, ndërsa materialet procedurale i janë referuar Prokurorisë për veprime të mëtejshme./ Periskopi/
