Pse Trump dhe NATO kanë një marrëdhënie të trazuar?

Trump ka kërcënuar me tërheqjen e SHBA-së nga NATO dhe ka vënë në pikëpyetje nëse aleanca është e vlefshme për Shtetet e Bashkuara, të cilat, sipas tij, mbulojnë barrën e sigurisë së Europës, që të mbeten anëtare.

Në muajt e fundit, ky qëndrim u shfaq qartë ndërsa SHBA-ja u përfshi në konfliktin me Iranin.

Çfarë do të thotë kjo: Vetë aleanca e NATO-s u krijua 77 vjet më parë dhe gjatë kësaj kohe strukturat e sigurisë amerikane dhe europiane janë ndërthurur. Por Trump nuk u konsultua me aleatët e tij europianë dhe të NATO-s përpara se të niste luftën kundër Iranit dhe ka sulmuar aleancën, si edhe liderë specifikë, për mungesën e gatishmërisë së tyre për t’u përfshirë dhe për të ndihmuar në garantimin e sigurisë së Ngushticës së Hormuzit.

Por, në të njëjtën kohë, Trump ka marrë meritat për rritjen e shpenzimeve të mbrojtjes nga vendet anëtare dhe herë pas here ka rikonfirmuar angazhimin e tij ndaj marrëveshjes së mbrojtjes kolektive të NATO-s.

Përveç luftës me Iranin, një tjetër pikë e ndjeshme në marrëdhënien mes NATO-s dhe Trump ishte kërcënimi i presidentit amerikan për ta përdorur forcën ushtarake për të marrë Grenlandën.

Trump pretendoi se kontrolli mbi Grenlandën – një territor i Danimarkës, vend aleat i NATO-s – ishte i domosdoshëm për sigurinë kombëtare dhe se do ta merrte atë “duan apo nuk duan ata”.

Kjo u dënua menjëherë nga aleatët dhe tronditi të gjithë aleancën perëndimore. Trump më vonë hoqi dorë nga kjo ide, por vazhdoi të kërcënonte me tarifa doganore ata që kundërshtonin përpjekjen e tij për ta marrë Grenlandën – duke thelluar përçarjen.