Të paktën katër cisterna të naftës dhe gazit kthehen mbrapsht në Ngushticën e Hormuzit

Cisternat Al Ghariya, Duhail dhe Al Ruwais po lëviznin ngadalë drejt perëndimit, në drejtim të Ngushticës së Hormuzit, përpara se të ndryshonin kurs dhe të ktheheshin mbrapsht vonë të martën, sipas të dhënave nga kompanitë analitike Kpler dhe LSEG, të cituara nga Reuters. Të tria cisternat e gazit natyror të lëngshëm (LNG), të kontrolluara nga QatarEnergy, ishin bosh dhe po drejtoheshin drejt terminalit të eksportit Ras Laffan në Katar për të ngarkuar mall.

Anija transportuese Lila Vadinar, me flamur indian, e cila transportonte 2 milionë fuçi naftë bruto nga Kuvajti, bëri një kthesë mbrapa pranë skajit të Omanit në Ngushticën e Hormuzit të mërkurën, sipas të dhënave të gjurmimit.

Megjithatë, disa anije ende po arrijnë të kalojnë përmes ngushticës pavarësisht rritjes së tensioneve. Mercury Hope, një cisternë shumë e madhe për transportin e naftës bruto (VLCC), me 2 milionë fuçi naftë bruto nga Emiratet e Bashkuara Arabe, doli nga ngushtica të mërkurën, sipas të dhënave.

Një tjetër VLCC, anija japoneze Tenjun, doli nga ngushtica vonë të martën, sipas Reuters. Një VLCC indoneziane me emrin Pertamina Pride gjithashtu doli nga ngushtica të martën me transponderin e fikur. Të dyja këto anije transportonin nga 2 milionë fuçi naftë./ Periskopi/