Filipinet hapin hetime mbi praktikat e Facebookut për privatësinë

Facebookun e presin kokëçarje të reja pasi qeveria filipinase ka thënë se po heton gjigantin e medias sociale lidhur me njoftimet se informatat personale të më shumë se 1 milion përdoruesve në Filipine i janë transferuar kompanisë britanike të analizimit të të dhënave, Cambridge Analytica.

Komisioni Kombëtar i Privatësisë në Filipine tha se i kishte dërguar një letër shefit ekzekutiv të Facebookut, Mark Zuckerberg për ta njoftuar se ky komision kërkon dokumentet përkatëse lidhur me çështjen, për të zbuluar sa i shtrirë ka qenë problemi. Komisioni njofton përmes faqes së tij elektronike se synon të zbulojë nëse ka pasur analiza të të dhënave personale të shtetasve filipinas pa autorizimin e tyre.

Letra mbante datën 11 prill.

Një zëdhënës i Facebookut tha për agjencinë e lajmeve Reuters se kompania është e përkushtuar për mbrojtjen e privatësisë së përdoruesve dhe se po bashkëpunon me entin rregullator në Filipine.