Shkak gjakmarrja, 25 plumba për 40-vjeçarin që u vra në Shqipëri

Qytetari shqiptar Aleksandër Koçeku raportohet se u vra për hakmarrje me 25 gëzhoja automatiku.

Vrasja u krye në një segment rrugor me lëvizje shumë të pakta automjetesh dhe pa kamera sigurie, një vend që, sipas rrethanave të deritanishme, duket se ishte zgjedhur me kujdes nga autorët për të minimizuar rrezikun e dështimit të atentatit.

Bëhet e ditur se hetimet e para janë përqendruar te pista e gjakmarrjes, ndërsa familjarët thonë se viktima jetonte nën kërcënimin e hakmarrjes që prej vitit 2017.

Koçeku u gjet i pajetë brenda automjetit të tij nga një kalimtar i rastit, i cili njoftoi policinë.

Ndërkohë, Aleksandër Koçeku ishte gjithashtu nën hetim nga Prokuroria e Shkodrës për dosjen e vrasjes së 19-vjeçarit Pavlin Preka, ndërsa afatet e hetimit për këtë çështje ishin zgjatur pak ditë më parë.