Cristiano Ronaldo këshillohet që të largohet nga Portugalia, pas eliminimit nga Botërori

Norvegjezi beson se sulmuesi i Al-Nassr nuk është më në gjendje të luajë në nivelin më të lartë dhe se prania e tij po e pengon përparimin e Portugalisë.

Riise vlerëson se ish-trajneri i Portugalisë, Roberto Martinez, e menaxhoi gabimisht situatën me Ronaldon gjatë mandatit të tij.

Eliminimi i Portugalisë nga Kupa e Botës 2026 ka rihapur debatin mbi vazhdimin e 41-vjeçarit në formacionin titullar, me shumë kritikë që besojnë se prania e tij kufizon fleksibilitetin taktik të ekipit.

Duke folur për “BestBettingSites”, Riise u shpreh i zhgënjyer me mënyrën se si ishte trajtuar situata e Ronaldos.

“E di që trajneri i Portugalisë e do Ronaldon, por mendoj se e gjithë situata me të në këtë Kupë Bote ishte mjaft e trishtueshme,” tha Riise.

“Në një moment ai nuk po shënonte, më pas tha se ishte rikthyer pasi realizoi disa gola, e më pas u zhduk sërish. Nuk mendoj se Roberto Martinez e menaxhoi si duhet këtë situatë. Ai duhej të tregonte më shumë autoritet dhe ta vendoste ekipin përpara individit”, shtoi ai.

Pavarësisht se Ronaldo është golashënuesi më i mirë në historinë e futbollit ndërkombëtar, Riise këmbëngul se ish-ylli i Real Madridit dhe Manchester Unitedit nuk i ka më cilësitë e nevojshme për të luajtur në nivelin më të lartë.

Duke parë drejt Euro 2028, norvegjezi beson se ka ardhur koha që Ronaldo t’ua lërë vendin brezit të ri të futbollistëve portugezë.

“Nuk besoj se Ronaldo do të jetë gati për Kampionatin Evropian dhe as nuk mendoj se aktualisht është mjaftueshëm i mirë për të luajtur për Portugalinë në atë nivel,” shtoi Riise.

“Ai duhet t’i japë fund karrierës me kombëtaren dhe t’ua kalojë mundësinë lojtarëve të rinj. Futbolli modern kërkon shumë fizikisht; të gjithë 11 lojtarët duhet të vrapojnë dhe të luftojnë për ekipin, përveç nëse je Messi. Ronaldo nuk e bën më këtë dhe mendoj se prania e tij e dobëson Portugalinë, në vend që ta ndihmojë”, u shpreh ai.

Thirrjet për tërheqjen e Ronaldos u shtuan pas eliminimit të Portugalisë nga Kupa e Botës, pas humbjes 1-0 ndaj Spanjës në fazën e 1/16 së finales.

Ronaldo u pa duke u larguar nga fusha me lot në sy, pasi arriti të shënonte vetëm një gol në fazën me eliminim direkt.

Megjithatë, sulmuesi i Al-Nassr deklaroi se nuk do të marrë “vendime të nxituara” për të ardhmen e tij menjëherë pas humbjes.

Duke reflektuar mbi karrierën e tij, Ronaldo tha:

“Jam i trishtuar që po largohem nga Kupa e Botës në këtë mënyrë. Dhashë gjithçka nga vetja. Bëra më të mirën. Ishte Kupa ime e fundit e Botës, po, por tani do të kem kohë të reflektoj dhe të jem me familjen time. Nuk do të marr vendime të nxituara. Nuk vendos asgjë në momentet e nxehta. Tani nuk ka rëndësi nëse do të vazhdoj apo jo”, e mbylli ai./Periskopi/