Autopsia zbulon shkakun e vdekjes së aktores turke Ece Irtem

Fillimisht ishte raportuar se aktorja kishte vdekur si pasojë e një sulmi në zemër, ndërsa më vonë u ngritën dyshime se vdekja e saj mund të kishte lidhje me një kafshim majmuni gjatë një udhëtimi në Tajlandë.

Pas kërkesës për hetime të mëtejshme dhe kryerjes së një autopsie të re, Instituti i Mjekësisë Ligjore në Turqi ka përcaktuar shkakun përfundimtar të vdekjes së aktores.

Sipas raportit mjeko-ligjor, Ece Irtem ka ndërruar jetë si pasojë e helmimit nga alkooli etilik.

Në analizat e kryera është konstatuar një nivel i lartë i alkoolit në gjakun e saj, rreth 395 mg/dl, ndërsa ekspertët kanë konkluduar se vdekja ka ardhur si pasojë e helmimit nga etanoli.

Më herët, familja e aktores kishte ngritur dyshime për një lidhje të mundshme mes vdekjes së saj dhe një kafshimi majmuni gjatë pushimeve në Tajlandë, pasi në krahun e saj ishin vërejtur disa shenja.

Avokati i saj kishte kërkuar që edhe kjo mundësi të shqyrtohej gjatë autopsisë, për shkak të rrezikut të komplikimeve të mundshme, përfshirë infeksione të rënda.

Në deklaratën e saj, nëna e aktores kishte treguar se natën para vdekjes kishin qenë në një festë ditëlindjeje dhe më pas ishin kthyer në shtëpi.

Ajo kishte deklaruar se vajza e saj kishte konsumuar shumë alkool dhe përdorte gjithashtu medikamente të forta kundër depresionit.

Sipas rrëfimit të nënës, ajo e kishte gjetur të bijën pa shenja jete mëngjesin e ditës pasuese.