9 minuta më parëSpektakli për rrënimin e pikës së derivateve u pagua 46 mijë euro më shtrenjt nga Ministria e Bujqësisë sesa oferta më e lirë (DOKUMENT)
Periskopi(një orë më parë)
(një orë më parë)Ministri në detyrë i Bujqësisë, Armend Muja, në kohë fushate rrënoi një pikë të derivateve që ishte ndërtuar në pronën e Ministrisë së Bujqësisë në Prishtinë. Muja, i ftoi mediat për ta xhiruar rrënimin, e po ashtu i krijojë disa video në rrjetet sociale duke u krenuar për veprimin e ndërmarr.
Mirëpo, ky rrënim u pagua më shtrenjt, ndërsa ofertat më të lira u eliminuan nga komisioni i kësaj ministrie, raporton Periskopi.
Ministria e Bujqësisë pagoi 65 mijë e 920 euro për rrënimin e objekteve ku planifikohet të ndërtohet objekti i ri i ministrisë, pasi eliminoi gjashtë nga shtatë operatorët ekonomikë që kishin konkurruar në këtë aktivitet prokurimi.
Sipas dokumenteve zyrtare, në tenderin me titull “Rrënimi i objekteve ku do të ndërtohet objekti i MBPZHR-së”, oferta më e ulët ishte paraqitur nga kompania “VB Holding” në vlerë prej vetëm 19 mijë eurosh, ndërsa oferta fituese e operatorit “Ermal Sylaj B.I.” arrin në 65 mijë e 920 euro.
Në garë kishin ofertuar gjithsej shtatë operatorë ekonomikë, me çmime që varionin nga 19 mijë deri në 78 mijë euro.
Megjithatë, komisioni vlerësues i ministrisë eliminoi të gjithë operatorët e tjerë, duke e lënë si ofertë të vetme të përgjegjshme atë të operatorit që përfundimisht fitoi kontratën. Sipas njoftimit për nënshkrimin e kontratës, nga shtatë ofertat e pranuara vetëm njëra u konsiderua e përgjegjshme.
Oferta më e lirë, ajo e kompanisë “VB Holding”, u refuzua me arsyetimin se operatori nuk kishte dorëzuar sqarime lidhur me çmimin e ofertuar, i cili ishte vlerësuar si “çmim jo normalisht i ulët”. Me të njëjtin arsyetim u eliminua edhe kompania “Tempo-2”, e cila kishte ofertuar 36 mijë e 552 euro.
Ndërkohë, kompania “Osmani Holding”, e cila kishte paraqitur ofertën e dytë më të ulët prej 34 mijë e 440 eurosh, u eliminua pasi komisioni vlerësoi se sqarimet e dorëzuara nuk ishin të mjaftueshme për të dëshmuar realizueshmërinë financiare të kontratës.
Në arsyetimin e ministrisë thuhet se operatori nuk kishte paraqitur analizë të qartë financiare, nuk kishte dëshmuar mjaftueshëm mbulimin e shpenzimeve minimale dhe nuk kishte ofruar justifikim bindës për kostot e paraqitura.
Po ashtu, grupi i operatorëve ekonomikë “Grand Construction” dhe “Vaakal”, me ofertë prej 59 mijë e 658 eurosh, u eliminua për shkak të mospërputhjeve në dokumentacionin e konsorciumit.
Ndërsa kompania “Horn & Co. Kosova”, e cila kishte ofertuar 73 mijë e 700 euro, u shpall e papërgjegjshme sepse kamionët e paraqitur nuk përputheshin me kapacitetin bartës të kërkuar në dosjen e tenderit.
Në fund, kontrata iu dha operatorit “Ermal Sylaj B.I.” me ofertë prej 65 mijë e 920 eurosh, ndonëse kjo ishte oferta e pestë më e ulët në mesin e shtatë ofertuesve.
Oferta fituese është46 mijë euro më e lartë se oferta më e lirë e dorëzuar në këtë aktivitet prokurimi./Periskopi/
