Sinjale të përziera për bisedimet me Iranin ndërsa i dërguari i Trump niset drejt Dohas – zhvillimet e fundit

Por zëdhënësi i Ministrisë së Jashtme të Iranit, Esmaeil Baghaei, tha se nuk janë planifikuar bisedime me SHBA-në në asnjë nivel gjatë ditëve të ardhshme, megjithëse një delegacion ekspertësh iranianë do të udhëtojë drejt Dohas më vonë këtë javë.

Baghaei tha se Irani dhe SHBA-ja ende nuk kanë hyrë në fazën e negociimit të një marrëveshjeje përfundimtare.

Mospërputhja në mesazhe ngre edhe më shumë dyshime nëse negociatorët mund ta respektojnë afatin 60-ditor, pasi të dyja palët shkëmbyen sulme gjatë fundjavës, duke vënë në sprovë armëpushimin e tyre tashmë të brishtë.

CNN shkruan për zhvillimet e fundit:

Në Iran: Baghaei tha se, sipas Nenit 13 të memorandumit të mirëkuptimit SHBA-Iran, bisedimet për një marrëveshje përfundimtare mund të fillojnë vetëm pasi të ketë nisur zbatimi i neneve 1, 4, 5, 10 dhe 11. Ai tha se SHBA-ja ka lëshuar licenca që lidhen me Nenin 10, i cili mbulon shitjet e naftës, dhe se Irani po punon për zbatimin e tyre. Ai shtoi se po ndiqet edhe zbatimi i Nenit 11, që ka të bëjë me asetet e ngrira. Në këtë kontekst, një delegacion ekspertësh do të udhëtojë drejt Dohas më vonë këtë javë, duke shtuar se çdo vizitë e SHBA-së në Katar nuk ka lidhje me udhëtimin e delegacionit iranian.

Presidenti iranian Masoud Pezeshkian tha se Irani do t’i respektojë angazhimet e tij nëse SHBA-ja bën të njëjtën gjë, duke paralajmëruar se Teherani do t’u përgjigjet me vendosmëri kërcënimeve. Ai tha gjithashtu se gjysma e 12 miliardë dollarëve të aseteve të ngrira të Iranit në Katar do t’i kthehen Teheranit — një çështje për të cilën SHBA-ja ka dhënë deklarata kontradiktore.

Në SHBA: Sekretarja për shtyp e Shtëpisë së Bardhë, Karoline Leavitt, i tha Fox News se do të ketë bisedime të nivelit të lartë, ndërsa paralelisht do të zhvillohen edhe bisedime teknike. “I dërguari i posaçëm (Steve) Witkoff dhe (dhëndri i Trumpit) Jared Kushner do të fluturojnë drejt Dohas për takime të nivelit të lartë këtë javë” tha ajo.

Në Izrael: Ministri i Mbrojtjes, Israel Katz, tha se Trump këmbënguli që luftërat në Liban dhe Iran të trajtoheshin së bashku gjatë bisedimeve për armëpushimin, pavarësisht dëshirës së Izraelit për t’i trajtuar ato si konflikte të ndara. Ai tha se Izraeli ka marrë mbështetjen e SHBA-së për të qëndruar në Liban derisa Hezbollah të çarmatoset në të gjithë vendin.

Në Ngushticën e Hormuzit: Zëvendësministri i Jashtëm i Iranit tha se largimi i minave do të kryhet vetëm nga Irani, duke kundërshtuar deklaratat e presidentit Emmanuel Macron, i cili kishte sugjeruar se Franca, Omani dhe vende të tjera do të bashkëpunonin. Sipas të dhënave të MarineTraffic, më shumë se dy duzina anijesh tregtare kaluan nëpër këtë pikë strategjike gjatë 24 orëve, një pjesë e vogël krahasuar me nivelet para luftës.

Në Liban: Kryetari i Parlamentit, Nabih Berri, i konsideruar një aleat kyç i Hezbollahut, e kritikoi marrëveshjen e ndërmjetësuar nga SHBA-ja mes Izraelit dhe vendit të tij, duke thënë se ajo “nuk do të zbatohet”. Përleshjet mes Hezbollahut, të mbështetur nga Irani, dhe forcave izraelite në jug të Libanit vazhduan gjatë fundjavës, disa ditë pasi të dy vendet nënshkruan një armëpushim të ri.