Lojtarët e Iranit e kanë lënë një letër të shkruar në zhveshtore, pas barazimit me Egjiptin

Aktualisht, Irani mbetet i pamposhtur dhe, sipas “Opta”, ka 86.23% gjasa të kualifikohet në fazën e 1/16-ës si një nga ekipet më të mira të renditura në vendin e tretë.

Skuadra e drejtuar nga Amir Ghalenoei renditet e treta në Grupin G, pas Egjiptit dhe Belgjikës.

Barazimi 1-1 ndaj Egjiptit u konsiderua një rezultat pozitiv, sidomos pasi iranianët rikuperuan disavantazhin e hershëm të golit të Mahmoud Saber, i cili shënoi vetëm pesë minuta pas fillimit të ndeshjes në Seattle.

Në minutën e 93-të, Shoja Khalilzadeh mendoi se kishte realizuar golin e fitores, por ai u anulua për pozicion jashtë loje, pasi një pjesë e këpucës së mbrojtësit 37-vjeçar rezultoi në pozicion të parregullt gjatë aksionit.

Edhe pse barazimi nuk ua siguroi matematikisht kualifikimin, iranianët lanë një mesazh prekës në dhomat e zhveshjes.

Në letër shkruhej:

“Ne vijmë nga Irani. Nga një tokë që, prej mijëra vitesh, e ka vendosur nderin mbi fitoren. Për ne, futbolli nuk është vetëm një garë rezultatesh, por një provë karakteri. Pikët mund të fitohen në shumë mënyra, por respekti jo.

Ndoshta një skuadër mund të kalojë grupin, por vetëm përmes drejtësisë dhe nderit mund të qëndrojë krenare përpara historisë. Fair play nuk është vetëm një rresht në rregullat e futbollit, por është shpirti i lojës.”

Mesazhi vazhdonte:

“Faleminderit Seattle për mikpritjen. Dhe faleminderit të gjithë iranianëve, që i dhanë zemrën, zërin dhe gjithë qenien e tyre Iranit. IRANI, gjithmonë me kokën lart.”

Ky nuk ishte mesazhi i parë i lënë nga Irani gjatë këtij Botërori. Pas barazimit ndaj Belgjikës më 21 qershor, ekipi kishte lënë një tjetër letër në dhomat e zhveshjes së stadiumit në Los Angeles.

Ajo thoshte:

“Nga Persia e lashtë mijëravjeçare te Irani i qytetëruar i sotëm, shpirti i Iranit mbetet i gjallë dhe i palëkundur.

Erdhëm në Los Angeles me krenari, garuam me nder dhe largohemi me dinjitet. Faleminderit Los Angeles për mikpritjen.

Dhe faleminderit çdo iraniani që i dha zemrën, zërin dhe shpirtin Iranit gjatë këtyre 180 minutave. U mbizotërofshin paqja, respekti dhe miqësia mes të gjitha kombeve.”

Sipas raportit, në fund të mesazhit përmendeshin edhe 168 viktimat e një sulmi me raketë në muajin shkurt.

Thuhet se raketa goditi një shkollë fillore në qytetin jugor të Minabit në ditën e parë të luftës mes SHBA-së dhe Iranit, duke vrarë të paktën 120 fëmijë, si dhe mësues, prindër, punonjës të shkollës dhe një teknik të një farmacie aty pranë.

Raporti shton se hetimet e mëvonshme sugjeruan se sulmi ka të ngjarë të ishte kryer me një raketë Tomahawk të prodhimit amerikan./ Periskopi/