Lionel Messi nuk do ta nisë nga fillimi ndeshjen ndaj Jordanisë

Trajneri dëshiron të menaxhojë ngarkesën fizike të kapitenit të tij, duke u dhënë njëkohësisht mundësi lojtarëve të tjerë të tregojnë vlerat e tyre para fazës me eliminim direkt.

Scaloni zbuloi se Messi nuk do të jetë titullar ndaj Jordanisë në Dallas. Duke thyer zakonin e tij për të mos zbuluar formacionin para ndeshjes, trajneri argjentinas konfirmoi se 39-vjeçari do të aktivizohet gjatë pjesës së dytë.

“Lionel Messi do të jetë në stol, por po jua them juve. Me shumë mundësi ai do të luajë në pjesën e dytë. Ky është një vendim i marrë kryesisht që edhe shokët e tij të skuadrës të kenë minuta në dispozicion. Do të shohim sa minuta do të luajë,” tha Scaloni në konferencën për shtyp.

Trajneri shpjegoi edhe filozofinë e rotacionit të tij:

“Djemtë që do të luajnë nesër e meritojnë këtë mundësi. Ata janë pjesë e skuadrës dhe një pjesë e madhe e gjithçkaje që kemi arritur është falë tyre. Edhe pse nuk kanë luajtur shumë, ata kanë qenë gjithmonë aty. Shpresa ime si trajner është që skuadra të luajë njësoj, edhe nëse ndryshojnë lojtarët.”

Me Messin që pritet të futet nga stoli, Argjentina mund të luajë me Lautaro Martinez dhe Julian Alvarez së bashku në sulm. Scaloni tha se ky është një opsion, por vetëm nëse nuk prishet ekuilibri i ekipit.

“Nëse lojtarët e tjerë bëjnë punën e tyre në aspektin fizik, Lautaro dhe Julian mund të luajnë së bashku. Gjithçka varet nga ekuilibri i skuadrës. Ata kanë luajtur bashkë edhe më parë dhe kemi nxjerrë përfundimet tona. Nuk po them se kjo nuk do të ndodhë më kurrë, por ne duam të ruajmë balancën.”

Sa i përket gjendjes së Cristian Romeros, Scaloni dha lajme pozitive:

“Cuti është mirë. Sot nuk u stërvit me grupin, por punoi veçmas me intensitet të lartë. Dëmtimi nuk është aq serioz sa mendonim fillimisht dhe kjo na jep qetësi.”