5 orë më parë"Komplotin e paralajmëroi babai i të dyshuarit", FBI arrestoi 5 persona që po planifikonin sulme terroriste pranë Shtëpisë së Bardhë
Periskopi(6 ditë më parë)
(6 ditë më parë)Një komplot me dronë eksplozivë dhe snajperë kishte si qëllim të godiste eventin e arteve marciale “UFC Freedom 250”, i organizuar për 80-vjetorin e Presidentit Donald Trump.
Drejtori i FBI-së, Kash Patel, njoftoi se pesë persona janë arrestuar si të dyshuar për përfshirje në një komplot të dështuar terrorist, transmeton Periskopi.
Sulmi ishte planifikuar të kryhej të dielën e kaluar kundër Shtëpisë së Bardhë, ku po mbahej eventi i arteve marciale UFC Freedom 250, organizuar për të shënuar 80-vjetorin e lindjes së Presidentit Donald Trump.
Sipas autoriteteve federale, në këtë rrjet të dyshuar bënin pjesë të paktën 12 persona të shpërndarë në katër shtete të ndryshme: Kaliforni, Ohajo, Misuri dhe Nebraska. FBI arriti të zbulonte planet pasi u infiltrua në një grup komunikimi të koduar në aplikacionin Signal.
Sinjali i parë i alarmit erdhi nga babai i njërit prej të dyshuarve, i cili njoftoi policinë pasi kishte parë mesazhet e djalit të tij. Grupi kishte planifikuar të takohej në Fredericksburg, Virxhinia, përpara se të udhëtonte drejt Uashingtonit për të vënë në jetë planin.
Plani i tyre përfshinte përdorimin e dronëve të ngarkuar me eksplozivë kundër Shtëpisë së Bardhë dhe ndërtesave qeveritare përreth. Sipas FBI-së, qëllimi ishte krijimi i panikut për të detyruar të ftuarit të largoheshin nga kompleksi, ku më pas do të sulmoheshin nga një ekip snajperësh të pozicionuar jashtë.
Disa media amerikane bëjnë të ditur se të dyshuarit i përkasin një ideologjie “përshpejtuese” (accelerationist), një lëvizje ekstremiste që synon të sjellë rënien e sistemit politik dhe ekonomik përmes dhunës për të shkaktuar ndryshime radikale. Hetuesit besojnë se shënjestrat kryesore të grupit ishin “elitat kapitaliste”, “miliarderët” dhe politikanët që mbështeten nga grupet pro-izraelite.
Drejtori i FBI-së, Patel, sqaroi përmes një mesazhi në rrjetin social X se agjencitë e zbatimit të ligjit u vunë në dijeni të kërcënimit më 10 qershor, katër ditë përpara ngjarjes ku mori pjesë edhe kampioni spanjoll Ilia Topuria. Ai theksoi se falë një operacioni të koordinuar ndërshtetëror, sulmi u “ndalua në vend” përpara se të ekzekutohej.
Nga samiti i G7 në Francë, Presidenti Donald Trump deklaroi të martën se nuk kishte pasur dijeni për këtë plan dhe shtoi me ironi se “të vetmet sulme që pa, ishin ato të luftëtarëve të UFC-së në kafaz”.
Hetimi mbi këtë rast mbetet i hapur dhe autoritetet nuk përjashtojnë mundësinë e arrestimeve të tjera në ditët në vijim./ET
