Evropa përfshihet nga vala e nxehtësisë ekstreme, paralajmërime në disa shtete

Ministria e Shëndetësisë në Itali ka shpallur alarm të kuq për valën e të nxehtit në 15 qytete, përfshirë Romën dhe Milanon, ndërsa të mërkurën numri i qyteteve të prekura pritet të rritet në 16. Autoritetet u kanë bërë thirrje qytetarëve të konsumojnë ushqim të lehtë, të qëndrojnë brenda gjatë orëve më të nxehta të ditës dhe të freskohen me ujë të ftohtë, për të shmangur rreziqet shëndetësore.

Ndërkohë, në Mbretërinë e Bashkuar është lëshuar gjithashtu një paralajmërim i kuq për shëndetin në gjashtë rajone të Anglisë, që do të zgjasë nga e mërkura deri të enjten. Paralajmërimi përfshin West Midlands, East Midlands, South East, South West, Londrën dhe East of England.

Autoritetet britanike paralajmërojnë se kjo situatë paraqet “rrezik për jetën edhe për popullatën e shëndetshme”, me ndikime të mundshme edhe në transport, furnizimin me ushqim, ujë dhe energji, si dhe në funksionimin e bizneseve.

Sipas parashikimeve, temperaturat në disa pjesë të Anglisë dhe Uellsit pritet të arrijnë nga 38 deri në 40 gradë Celsius, ndërsa meteorologët kanë lëshuar një paralajmërim të rrallë të kuq për një zonë të gjerë që përfshin nga Londra deri në Swansea dhe nga Somerset deri në Birmingham.

Paralajmërimet vijnë në një kohë kur një studim i publikuar në revistën “Nature Climate Change” tregon se ekspozimi global ndaj stresit të rrezikshëm nga nxehtësia është rritur ndjeshëm gjatë 50 viteve të fundit, i nxitur nga ndryshimet klimatike. Sipas studimit, përqindja e popullsisë botërore që përjeton të paktën një ditë me nxehtësi ekstreme është rritur nga 16% në vitet 1970 në 22% në ditët e sotme.

Ekspertët theksojnë se “stresi nga nxehtësia” – i shkaktuar nga temperaturat e larta dhe lagështia – është një nga shkaqet më të shpeshta të vdekjeve të lidhura me motin në mbarë botën.