Marsi i shpresës së punëtorëve po ikën: A do të miratohet edhe 7 orë Ligji i Pagave, a veç premtim bosh i Kurtit

Ligji i Pagave do të shkojë në Qeveri për miratim në muajin mars të vitit 2022. Kështu kishte thënë në janar Qeveria e Kosovës. Miratimin e tij e kishte premtuar edhe vet kryeministri Albin Kurti. Mirëpo aq sa duket, po ikën marsi, e ky Ligj shumë i kërkuar për sektorin publik nuk po del të jetë askund. Tash e 1 vit, kemi parë revoltë të sindikatave, paralajmërime të grevave e protestave, deri tek trazirat sociale…

Ishte 30 qershori i vitit 2020 kur Gjykata Kushtetuese kishte rrëzuar Ligjin e atëhershëm për Paga, të miratuar nga Qeveria Haradinaj.

Si rezultat, kishte nisur hartimi i draft Projektligjit të ri. Ndonëse kishin nisur konsultimet me sindikatat që mbrojnë të drejtat e punëtorëve në sektorin publik, ato gjatë tërë kohës kishin shprehur pakënaqësi me numrat e koeficientëve që i parashihte Qeveria Kurti.

Përgjatë krejt vitit të kaluar, Sindikata e Bashkuar e Arsimit (SBASHK), Federata e Sindikatave të Shëndetësisë (FSSHK), administrata shtetërore etj, përmes protestave e paralajmërimeve për greva  kërkonin rritje të koeificientit të pagave për mësues, mjekë e shërbyes civilë.

Në mesin e më të zëshmëve pa dyshim ishte Rrahman Jasharaj i SBASHK’ut. Thuajse përditë kërcënonte Qeverinë Kurti me grevë. Ai u ankonte se ministri Hekuran Murati nuk po i pret as nëpër takime për të dëgjuar kërkesat e tyre.

‘Kemi me ia shymë tymin e duhanit Qeverisë Kurti’, ishte një deklaratë e Jasharajt për Periskopin.

Njëjtë ishte situata edhe me mjekët e infermierët. Protesta të mantelbardhëve para Qeverisë, e paralajmërime për trazira sociale. Kreu i FSSHK’së, para vitit të ri kishte thënë  se nëse Ligji i Pagave nuk kalon deri në mars, atëherë seriozisht do marrin veprime.

E sot, ku jemi në ditën e fundit të këtij muaji shpresëdhënës, Periskopi kontaktoi sërish Sylën, i cili si i mashtruar e  i zhgënjyer nga Qeveria Kurti, tha se do të mblidhen nesër e do të shohin se çka do të ndërmarrin tutje.

Zëdhënësi i Qeverisë, Përparim Kryeziu në muajin shkurt pati deklaruar se projektligji për paga në sektorin publik është në fazën e fundit të hartimit.

“Qeveria e Republikës së Kosovës, konkretisht Ministria e Punëve të Brendshme veçse ka filluar që të kontaktoj me të gjitha sindikatat relevante. Ministria e Punëve të Brendshme, sipas programit, planifikon që projektligjin në fjalë ta dërgojë për miratim në Qeverinë e Republikës së Kosovës brenda muajit mars”, ka theksuar Kryeziu.

Në një draft të ligjit të ri janë caktuar koeficientet, por jo edhe vlera e koeficientit bazë.

Sipas një pasqyre të publikuar para disa javëve, pagat në sektorë të ndryshëm, me ligjin e ri do të mund të jenë si në vijim:

E për vonesën e këtij Ligji aq të rëndësishëm, sot nga opozita reagoi AAK’ja. Me vendosjen e pankartave në Kuvend, shtrohej pyetja ‘’Ku është Ligji i Pagave? Një përgjigje e dha kryeparlamentari Glauk Konjufca. Tregoi se kanë mbetur edhe 7 orë kohë për miratimin e tij. Duke u bazuar nga ky moment, shtrohet pyetja se  a do ta miratojë Qeveria Kurti Ligjin e Pagave brenda 6 orëve sa kanë mbetur, a po do të dalë e dështuar edhe në këtë premtim./PERISKOPI/