Presidenti i UEFA-s e bojkotoi finalen e Botërorit, kjo është arsyeja

Sulmuesi i Shteteve të Bashkuara, Folarin Balogun, ishte në qendër të polemikave para ndeshjes së 1/8 së finales ndaj Belgjikës.

Futbollisti i Monacos ishte ndëshkuar me karton të kuq për një ndërhyrje ndaj Tarik Muharemovic në fitoren 2-0 të SHBA-së ndaj Bosnjë dhe Hercegovinës në fazën e 1/16 së finales.

Sipas rregullave të FIFA-s, ai duhej ta humbiste automatikisht ndeshjen pasuese kundër Belgjikës.

Ai deklaroi: “Nuk i thashë (Gianni Infantinos) se çfarë duhej të bënte. Nuk mund t’i them unë se çfarë të bëjë. Nuk ishte faull. Madje nuk ishte as shkelje. Ishin dy lojtarë që po vraponin me shpejtësi të plotë dhe u përplasën me njëri-tjetrin. Nuk mund ta vendosësh këmbën me qëllim mbi këmbën e dikujt tjetër kur je duke vrapuar me atë shpejtësi. Ishin dy atletë të shkëlqyer që thjesht u ngatërruan”.

Sipas raportimit të “The Times”, Čeferin ende nuk e ka lënë pas këtë çështje dhe vendosi të mos marrë pjesë në finalen e Kupës së Botës, ku saga e Balogunit ishte një nga arsyet kryesore të mungesës së tij.

Raportohet se marrëdhëniet mes UEFA-s dhe FIFA-s janë tensionuar pas këtij turneu.

Čeferin thuhet se ka qenë gjithashtu i pakënaqur me vendimin e autoriteteve amerikane për të mos lejuar hyrjen në SHBA të gjyqtarit somalez Omar Artan, i cili më vonë u caktua të drejtojë finalen e Superkupës së UEFA-s mes Paris Saint-Germain dhe Aston Villas në muajin gusht.

Pakënaqësi brenda UEFA-s ka shkaktuar edhe mënyra se si FIFA trajtoi kombëtaren e Iranit gjatë turneut, si dhe ndryshimet në rregullat e lojës, përfshirë futjen e pushimeve për hidratim dhe zgjatjen e pushimit mes dy pjesëve në finale për shkak të spektaklit të organizuar në pjesën e parë.

Čeferin, i cili ishte i pranishëm në ndeshjen hapëse të Botërorit mes Meksikës dhe Afrikës së Jugut, ka qenë gjithashtu një kritik i hapur i strategjisë së FIFA-s për çmimet dinamike të biletave.