Gecaj: Abdixhiku i ka thënë një ish-ministri të LDK’së “Edhe nëse ndahet partia, unë nuk jap dorëheqje”

Përmes një postimi publik, Gecaj tha se, sipas informacioneve të publikuara nga një gazetar, Abdixhiku i ka thënë një ish-ministri të LDK-së se "edhe nëse ndahet partia, unë nuk jap dorëheqje". Ai shtoi se e beson këtë deklaratë, duke pretenduar se Abdixhiku, para se t'i bashkohej LDK-së, kishte shqyrtuar themelimin e një partie të re, por ishte këshilluar të hynte në LDK.

Gecaj tha se shqetësimi kryesor nuk është nëse Abdixhiku ka vullnet për ta çuar partinë drejt ndarjes, por nëse delegatët do të kenë guximin dhe vendosmërinë për ta mbrojtur LDK-në.

Postimi i plotë:

AMAN, DELEGATË, MOS LEJONI NDARJEN E LDK-së!

Mos e sakrifikoni partinë për qejfet, inatet dhe ambiciet e një individi. Sipas informatave të publikuara nga një gazetar, Kryetari Lumir Abdixhiku i paska thënë një ish-ministri të LDK-së: "Edhe nëse ndahet partia, unë nuk jap dorëheqje." Personalisht, nuk e kam të vështirë ta besoj këtë deklaratë. Përkundrazi, e besoj plotësisht, sepse kam informacione të sigurta se, para se t'i bashkohej LDK-së, ai kishte shqyrtuar themelimin e një partie të re, por ishte këshilluar nga disa miq që të hynte në LDK dhe ta "merrte kalanë nga brenda."

Prandaj, çështja nuk është nëse Kryetari Abdixhiku ka apo jo vullnet ta çojë partinë drejt ndarjes. Sjelljet dhe veprimet e deritanishme flasin vetë. Pyetja e vërtetë është se a kemi ne vullnetin, guximin dhe vendosmërinë ta mbrojmë LDK-në, shtyllën e lirisë, pavarësisë dhe demokracisë, nga autokracia e brendshme, nga një ndarje tjetër dhe nga rreziku i shpërbërjes së saj përfundimtare? Përgjigjja duhet të jetë e qartë dhe e prerë. Të nderuar delegatë, përgjegjësia është në duart tona. Mos të lejojmë që historia të na kujtojë këtë kohë si momentin kur heshtja e shumicës e mundësoi shkatërrimin e LDK-së.