Refuzohet ankesa e VV’së nga Supremja, mbetet në fuqi gjoba për përfshirjen e të miturve në tubime zgjedhore

Rasti lidhet me dy tubime zgjedhore të organizuara nga LVV më 3 qershor në Podujevë dhe Lipjan, për të cilat Organizata Joqeveritare Instituti Demokratik i Kosovës (KDI) kishte paraqitur ankesa. Pas bashkimit të procedurave, PZAP kishte konstatuar se pjesëmarrja e fëmijëve në këto aktivitete përbënte shkelje të nenit 5, paragrafi 3 të Rregullores Zgjedhore Nr. 07/2024.

Në ankesën e saj, LVV kishte argumentuar se dispozita në fjalë nuk ndalon çdo prani të të miturve në aktivitete politike, por vetëm angazhimin aktiv të tyre nga subjektet politike, duke pretenduar se një angazhim i tillë nuk ishte provuar në rastin konkret.

Megjithatë, Kolegji i Gjykatës Supreme vlerësoi se ankesa nuk qëndron. Sipas gjykatës, PZAP ka zbatuar drejt dispozitat përkatëse të rregullores zgjedhore dhe qëllimi i nenit 5, paragrafi 3 është mbrojtja e të miturve nga përfshirja në aktivitete politike dhe zgjedhore.

Gjykata theksoi se interpretimi i kësaj dispozite duhet të bëhet në përputhje me interesin më të mirë të fëmijës dhe me standardet vendore e ndërkombëtare për mbrojtjen e të drejtave të fëmijëve.

Po ashtu, Supremja vlerësoi se përgjegjësia e subjektit politik nuk përjashtohet nga fakti nëse të miturit kanë qenë të shoqëruar nga prindërit apo nëse iniciativa për pjesëmarrje ka ardhur nga vetë ata.

Lidhur me lartësinë e gjobës, gjykata konstatoi se PZAP ka marrë parasysh natyrën dhe peshën e shkeljes, ndikimin e mundshëm në procesin zgjedhor, si dhe faktin se LVV ishte njoftuar më herët me obligimet ligjore dhe kishte qenë e sanksionuar edhe për shkelje të ngjashme.

Me këtë vendim, Gjykata Supreme ka lënë në fuqi vendimin e PZAP-it dhe ka refuzuar ankesën e Lëvizjes Vetëvendosje.