9 minuta më parëPrishtina mirëpret mbi 1,300 fëmijë në “Rilindja Kids Tournament 2026”
Periskopi(2 orë më parë)
(2 orë më parë)Me rastin e përvjetorit të Çlirimit të Prishtinës, KF Rilindja po organizon për të tetin vit radhazi turneun tradicional “Rilindja Kids Tournament 2026”, i cili tashmë konsiderohet një nga ngjarjet më të mëdha të futbollit për grupmoshat e reja në rajon.
Turneu ka mbledhur skuadrat më cilësore nga të gjitha trevat shqiptare: Kosova, Shqipëria dhe Maqedonia e Veriut, duke krijuar një atmosferë të veçantë sportive, miqësore dhe konkurruese.
Në edicionin e këtij viti po marrin pjesë 85 skuadra në kategoritë U9, U10 dhe U11, me më shumë se 1,300 fëmijë, të cilët do të garojnë gjatë katër ditëve të mbushura me ndeshje futbolli, emocione dhe frymë fair-play.
Organizatorët theksojnë se, përveç garës sportive, turneu synon të promovojë vlerat e respektit, miqësisë dhe bashkëpunimit ndërmjet të rinjve, duke ofruar një platformë të rëndësishme për zhvillimin e talenteve të reja.
“Rilindja Kids Tournament 2026” pritet ta shndërrojë Prishtinën në qendrën e futbollit të fëmijëve nga mbarë trevat shqiptare, duke sjellë së bashku qindra sportistë të rinj, trajnerë dhe familje në një festë të vërtetë të sportit.
