Perez drejt një tjetër mandati në krye të Real Madridit, kryeson bindshëm në zgjedhje

Sipas raportimit të Marca, Pérez aktualisht po prin me 66.53 për qind të votave të numëruara, ndërsa kundërkandidati i tij, Enrique Riquelme, ka marrë 33.47 për qind.

Nëse ky trend vazhdon deri në përfundim të numërimit, Pérez do të vazhdojë të qëndrojë në krye të klubit madrilen, duke fituar besimin e shumicës së anëtarëve për një mandat të ri.

Zgjedhjet presidenciale të këtij viti kanë tërhequr vëmendje të madhe në botën e futbollit, pasi për herë të parë pas shumë vitesh Florentino Pérez u përball me një sfidues të drejtpërdrejtë për postin më të lartë në klub.

Nën drejtimin e Pérez, Real Madridi ka përjetuar një nga periudhat më të suksesshme në historinë e tij moderne, duke fituar trofe të shumtë vendas dhe ndërkombëtarë, përfshirë disa tituj të Ligës së Kampionëve.

Megjithëse rezultati zyrtar ende nuk është konfirmuar, gjithçka tregon se Florentino Pérez është në rrugën e duhur për të siguruar një tjetër fitore në zgjedhjet presidenciale të klubit më të madh spanjoll./ Periskopi/