KMSHK reagon ashpër ndaj KPM-së: Dënojmë fuqishëm deklarimin për mbylljen e “Debat Plusit”

Në një vendimmarrje urgjente online, anëtarët e këtij këshilli e kanë dënuar fuqishëm deklarimin e nënkryetares së KPM-së, Drita Morina, e cila, pa asnjë mbështetje në Kodin e Etikës të KPM-së, sipas këshillit, ka paralajmëruar mbylljen e emisionit “Debat Plus” në RTV Dukagjini.

“Si profesionistë të mediave gjykojmë se organet e pavarura duhet të kenë shumë kujdes gjatë trajtimit të ankesave të tipit SLAPP ndaj mediave, sidomos kur ato ushtrohen nga eksponentë të partive politike.”, thuhet në deklaratën e KMSHK-së.

Ky këshill i ka bërë thirrje KPM-së që të ruajë pavarësinë dhe të gjykojë drejt, në përputhje me standardet e Kodit të Etikës të KPM-së.

KMShK, po ashtu, u ka bërë thirrje anëtarëve të KPM-së të përmbahen nga deklaratat e pamatura dhe të pabazuara për cilësinë e raportimeve në mediat e vendit.

“Deklarata të tilla paralajmëruese dhe të pabazuara përbëjnë presion të drejtpërdrejtë ndaj lirisë së shprehjes dhe lirisë së mediave.”, thuhet në deklaratë.

Në fund, KMShK u ka bërë thirrje anëtarëve të tjerë të KPM-së që të distancohen publikisht nga nisma të tilla, të cilat ndikojnë seriozisht në lirinë e mediave në vend.