“Dua të largohem”, Angelina Jolie tregon pse nuk ndihet më e lirë në Hollywood

Në një intervistë për Wall Street Journal Magazine, fituesja e çmimit Oscar tha se, nëse do ta niste sot karrierën nga e para, ndoshta nuk do të zgjidhte rrugën e aktrimit. Megjithatë, ajo theksoi se nuk mund të heqë dorë nga ky profesion, pasi mbetet burimi kryesor i të ardhurave që i mundëson të mbështesë familjen dhe standardin e jetesës që ka ndërtuar ndër vite.

Jolie zbuloi gjithashtu se shpreson të kalojë më shumë kohë në shtëpinë e saj në Kamboxhia dhe se një ditë dëshiron të zhvendoset atje.

“Kjo lidhet me atë që ndodhi pas divorcit tim. E humba mundësinë për të jetuar dhe udhëtuar lirshëm”, u shpreh Jolie, duke iu referuar betejës së gjatë ligjore me ish-bashkëshortin e saj, Brad Pitt.

Ajo shtoi se do të largohet nga Los Angelesi sapo t’i krijohet mundësia.

Në intervistë, aktorja foli edhe për sfidat emocionale me të cilat është përballur vitet e fundit, duke pranuar se nuk ka pothuajse fare jetë sociale.

“Nuk kam ndonjë jetë të mirëfilltë sociale”, tha ajo.

Jolie vuri theks të veçantë te roli i nënës, duke treguar se ardhja në jetë e fëmijëve ndryshoi tërësisht mënyrën se si e shihte botën.

“U bëra nënë në moshën 26-vjeçare. E gjithë jeta ime ndryshoi. Fëmijët më shpëtuan dhe më mësuan ta jetoj këtë botë në një mënyrë krejt tjetër”, u shpreh ajo.

Aktorja zbuloi gjithashtu se prej rreth dhjetë vitesh nuk ndihet plotësisht vetvetja.

“Mendoj se kohët e fundit do të kisha rënë në një gjendje shumë më të errët po të mos ishte dëshira ime për të jetuar për fëmijët e mi”, tha aktorja./ Periskopi/