Washington Post: Disa sende të zakonshme në shtëpi mund të jenë fatale për macet dhe qentë

Megjithatë, ekspertët paralajmërojnë se rreziku për kafshët shtëpiake ekziston gjatë gjithë vitit. Veterinerët thonë se shumë sende të zakonshme shtëpiake mund të shkaktojnë helmim te kafshët.

Edhe pse lista e substancave toksike për macet është më e kufizuar se për qentë – pjesërisht pasi macet janë më përzgjedhëse në ushqim – ato janë shumë më të ndjeshme ndaj helmeve dhe shpesh kanë pasoja më të rënda.

Zambakët – rrezik i madh për macet

Lulet e zambakut, përfshirë zambakun e Pashkës, zambakun aziatik “Tiger lily” apo “Oriental lily”, janë jashtëzakonisht helmuese për macet.

Edhe një kafshim i vogël i gjetheve ose petaleve mund të shkaktojë dëmtime të shpejta të veshkave.

Simptomat mund të përfshijnë humbje oreksi, të vjella, lodhje dhe në disa raste dridhje apo konvulsione.

Veterinerët paralajmërojnë se edhe poleni i këtyre luleve mund të jetë fatal nëse macja e merr në putra dhe e lëpin më pas.

Nëse trajtimi nuk bëhet brenda 24-48 orëve, rreziku i vdekjes është shumë i lartë.

Medikamente për njerëzit

Edhe ilaçet e zakonshme kundër dhimbjes mund të jenë shumë të rrezikshme për macet. Medikamente si ibuprofeni ose acetaminofeni mund të shkaktojnë dështim të veshkave ose dëmtime të rënda të mëlçisë.

Ekspertët theksojnë se për macet nuk ekziston një dozë e sigurt për disa prej këtyre ilaçeve, pasi edhe një sasi shumë e vogël mund të jetë fatale.

Medikamente kundër pleshtave për qentë

Produkte kundër pleshtave dhe rriqrave që përdoren për qentë shpesh përmbajnë përbërës si permetrina, të cilët janë toksikë për macet.

Edhe kontakti me një qen që është trajtuar me këto produkte mund të shkaktojë simptoma neurologjike tek macet, si dridhje, pështymë e tepërt apo lëvizje të pakontrolluara.

Rreziqe të tjera për kafshët

Disa rreziqe të tjera të zakonshme në shtëpi për qentë dhe macet, përfshijnë:

• rrushin dhe rrushin e thatë

• ëmbëlsuesin xylitol që gjendet në çamçakëz dhe produkte dietike

• çokollatën

• qepët dhe hudhrën

• bimët dekorative

• helm për minj

• objekte që përmbajnë zink, si monedhat moderne.

Trajtimi dhe rëndësia e reagimit të shpejtë

Veterinerët theksojnë se reagimi i shpejtë është vendimtar.

Në shumë raste trajtimi përfshin shkaktimin e të vjellave, përdorimin e qymyrit aktiv dhe terapi me lëngje intravenoze. Në raste të rënda mund të nevojitet edhe dializë.

Sipas specialistëve, edhe një vonesë prej disa orësh për të çuar kafshën te veterineri mund të bëjë diferencën mes jetës dhe vdekjes.