Një ‘superkontinent’ i ri mund të zhdukë njerëzit dhe ta bëjë Tokën të pabanueshme

Formimi i një “superkontinenti” të ri mund të zhdukë njerëzit dhe të gjithë gjitarët e tjerë ende gjallë në 250 milionë vjet, po thonë  studiuesit.

Duke përdorur modelet e para të klimës superkompjuterike të së ardhmes së largët, shkencëtarët nga Universiteti i Bristolit në Mbretërinë e Bashkuar parashikuan se si ekstremet klimatike do të intensifikoheshin pasi kontinentet e botës të bashkohen për të formuar një superkontinent, Pangea Ultima, në rreth 250 milionë vjet.

Ata zbuluan se do të ishte jashtëzakonisht e nxehtë, e thatë dhe praktikisht e pabanueshme për njerëzit dhe gjitarët, të cilët nuk janë zhvilluar për të përballuar ekspozimin e zgjatur ndaj nxehtësisë së tepërt.

Studiuesit simuluan tendencat e temperaturës, erës, shiut dhe lagështisë për superkontinentin dhe përdorën modele të lëvizjes së pllakave tektonike, kimisë së oqeanit dhe biologjisë për të llogaritur nivelet e dioksidit të karbonit, shkruan CNN.

Ata zbuluan se jo vetëm që formimi i Pangea Ultima do të çonte në shpërthime më të rregullta vullkanike, duke nxjerrë dioksid karboni në atmosferë dhe duke ngrohur planetin, por edhe dielli do të bëhej më i ndritshëm, duke emetuar më shumë energji dhe duke ngrohur më tej Tokën, vunë në dukje ekspertët në revistën Nature Geoscience.

“Superkontinenti i saposhfaqur do të krijonte në mënyrë efektive një goditje të trefishtë që përfshin efektin e kontinentitetit, diellin më të nxehtë dhe më shumë CO2 në atmosferë,” tha në një njoftim të hënën Alexander Farnsëorth, bashkëpunëtor i lartë kërkimor në Universitetin e Bristol dhe autori kryesor i letrës.

Farnsworth vuri në dukje se rritja e nxehtësisë, do të krijonte një mjedis pa burime ushqimi ose uji për gjitarët.

“Është thelbësore të mos harrojmë krizën tonë aktuale klimatike, e cila është rezultat i emetimeve njerëzore të gazeve serrë,” tha në njoftim bashkautorja Eunice Lo, studiuese në ndryshimin e klimës dhe shëndetit në Universitetin e Bristolit.