Post-Covid: Studimi zbulon se këto simptoma vazhdojnë edhe 6 muaj pas infektimit

Shumica e pacientëve që kanë qënë shtruar në spital me Covid-19 ende vuajnë një larmi simptomash – përfshirë lodhje dhe vështirësi në gjumë – gjashtë muaj pas infektimit, ka zbuluar një studim i ri i kryer në Kinë.

Studimi i më shumë se 1,700 pacientëve të trajtuar në qytetin Wuhan, epiqendra fillestare e pandemisë, tregoi se 76% patën të paktën një simptomë muaj pasi dolën nga spitali. Gjetjet tregojnë se edhe njerëzit që shërohen nga Covid-19 mund të pësojnë efekte afatgjata shëndetësore nga periudha e tyre me koronavirusin, i cili ka infektuar më shumë se 90 milionë njerëz në të gjithë botën.

Studimi, më i madhi në llojin e tij i kryer deri në këto momente, u botua në revistën mjekësore The Lancet. Sipas hulumtimit, u zbulua se lodhja dhe vështirësitë e gjumit ishin simptomat më të zakonshme të post-Covid, të cilat ndodhin përkatësisht në 63% dhe 26% të pacientëve, gjashtë muaj pas fillimit të simptomave fillestare.

Sëmundja mund të ketë gjithashtu komplikime psikologjike afatgjata, me ankth ose depresion të raportuar midis 23% të pacientëve. Pacientët të cilët ishin të sëmurë më rëndë, kanë tendencën të kenë prova të vazhdueshme të dëmtimit të mushkërive.

“Për shkak se Covid-19 është një sëmundje kaq e re, ne sapo kemi filluar të kuptojmë disa nga efektet e saj afatgjata në shëndetin e pacientëve”, Dr. Bin Cao i China-Japan Friendship Hospital dhe Capital Medical University, i cili drejtoi studimin ekipit.

“Analiza jonë tregon se shumica e pacientëve vazhdojnë të jetojnë me të paktën disa nga efektet e virusit pas daljes nga spitali dhe thekson nevojën për kujdes të vazhdueshëm, veçanërisht për ata që përjetojnë infeksione të rënda. Puna jonë gjithashtu nënvizon rëndësinë e kryerjes së studimeve më të gjata në popullata më të mëdha në mënyrë që të kuptohet spektri i plotë i efekteve që Covid-19 mund të ketë tek njerëzit,” thuhej në deklaratë.

Efektet afatgjata të shëndetit të Covid-19

Shkencëtarët në të gjithë botën po studiojnë efektet afatgjata të virusit, zakonisht të referuara si simptoma “të gjata Covid”. Qendrat Amerikane për Kontrollin dhe Parandalimin e Sëmundjeve (CDC) rendit lodhjen, gulçimin, kollën, dhimbjen e kyçeve dhe dhimbjen e gjoksit si simptomat më të zakonshme afatgjata. Të tjerat, të tilla si vështirësia në të menduar dhe përqendrimi – i njohur si “mjegulla e trurit”, depresioni dhe dhimbja e kokës, raportohen gjithashtu.