2 minuta më parëA do të nënshkruajë Teuta Rugova marrëveshje me PAN’in? (Foto)
Periskopi(9 vite më parë)
(9 vite më parë)Para pak çastesh, u raportua se deputetja e zgjedhur nga radhët e koalicionit LAA, Teuta Rugova, do të nënshkruajë marrëveshje me koalicionin PAN, për votimin e Ramush Haradinajt për kryeministër, transmeton Periskopi. Lidhur me këtë nuk ka ende asnjë konfirmim zyrtar, përveç një fotografie të publikuar, në të cilën shihet Haradinaj me ekipin e tij […]
Lidhur me këtë nuk ka ende asnjë konfirmim zyrtar, përveç një fotografie të publikuar, në të cilën shihet Haradinaj me ekipin e tij në Rezidencën e Familjes Rugova.
Për këtë çështje, Periskopi ka kontaktuar deputeten Rugova, por kontakti me të ka qenë i pamundur.
Ndërsa, nënkryetari i LDK’së, Haki Rugova për Periskopin tha se nuk beson se do të ndodhë një gjë e tillë.
“Nuk kam asnjë informacion për këtë çështje, por nuk besoj se do të ndodhë një gjë e tillë”, tha Rugova për Periskopin.
Po ashtu, Periskopi vazhdimisht ka kontaktuar zyrtarë të Aleancës për Ardhmërinë e Kosovës për t’i pyetur për këtë çështje, por kontakti me ta ka qenë i pamundur.
Në anën tjetër, kandidati për kryeministër nga radhët e PAN’it, Ramush Haradinaj, ka publikuar në rrjetin social “Facebook” fotografi nga homazhet që ka bërë me ekipin e tij mëngjesin e sotëm tek varri i ish-presidentit, Ibrahim Rugova.
“Në nderim të Presidentit historik, dr. Ibrahim Rugova, arkitektit të pavarësisë së Kosovës dhe prijësit të lëvizjes për liri e demokraci. Vepra e tij, udhëheqja dhe vizioni i tij do të jenë frymëzim për ndërtimin e shtetit të Kosovës, të ardhmes së tij të sigurt në miqësi të përhershme me SHBA-të, dhe e barabartë me kombet e tjera në botë. I përjetshëm kujtimi për Presidentin Rugova”, ka shkruar Haradinaj në Facebook.
Pas homazheve tek varri, Haradinaj vizitoi edhe familjen Rugova, ku besohet se po qëndron aktualisht, transmeton Periskopi.
Ndryshe, Teuta Rugova u përfol si një nga deputetet nga koalicioni LAA që mund ta votojë Haradinajn për kryeministër, për shkak të afërsisë që ky i fundit e kishte pasur me babain e Teutës, ish-presidentin Rugova.
Po ashtu, vazhdimisht ka pasur deklarata nga PAN se tashmë janë arritur votat e mjaftueshme për formimin e Qeverisë, por nuk janë përmendur asnjëherë emrat konkret të deputetëve që mund ta votojnë Haradinajn.
Edhe dy javë pas certifikimit të rezultateve nga Komisioni Qendror Zgjedhor, presidenti Thaçi ende nuk e ka thirrur seancën konstituive të Kuvendit të Kosovës./Periskopi
