Një “gjeneral” slloven për finalen e Kupës së Botës: Kush është Slavko Vincic, referi i ndeshjes Spanjë-Argjentinë

Emërimi i tij përbën një moment historik për futbollin slloven, pasi Vinčić bëhet arbitri i parë nga Sllovenia që drejton finalen e një Kampionati Botëror. Në një video të publikuar nga FIFA, 46-vjeçari shfaqet dukshëm i emocionuar në momentin kur mëson se do të jetë arbitri kryesor i ndeshjes më të rëndësishme të futbollit botëror.

Kjo është pjesëmarrja e dytë e Vinčić në një Kupë Bote për meshkuj. Në Katar 2022 ai gjykoi dy ndeshje të fazës së grupeve, ndërsa në Botërorin 2026 ka qenë arbitër në pesë takime, përfshirë edhe sfidën e fazës me eliminim direkt mes Meksikës dhe Ekuadorit.

Finalja mes Spanjës dhe Argjentinës nuk do të jetë hera e parë që ai drejton një ndeshje për trofe. Në vitin 2024, UEFA i besoi finalen e Ligës së Kampionëve, ku Real Madridi mposhti Borussia Dortmundin me rezultatin 2-0 në stadiumin “Wembley”.

Po ashtu, ai ka gjykuar finalen e Europa League në vitin 2022, ku Eintracht Frankfurt triumfoi ndaj Rangers pas gjuajtjeve të penalltive. Në Kampionatet Europiane, Vinčić ka drejtuar disa nga sfidat më prestigjioze, përfshirë gjysmëfinalen Spanjë–Francë në Euro 2024 dhe çerekfinalen Itali–Belgjikë në Euro 2021.

Profili i Slavko Vinčić

Mosha: 46 vjeç

Datëlindja: 25 nëntor 1979, Maribor (Slloveni)

Arbitër në elitën sllovene: që nga viti 2007

Arbitër i FIFA-s: që nga viti 2010

Ndeshje në Kupën e Botës: 5 (2022 dhe 2026)

Ndeshje në Kampionatin Europian: 6 (2021 dhe 2024)

Arbitër në Champions League: që nga viti 2016

Ndeshje në Champions League: 50, prej tyre 16 në fazën me eliminim direkt

Finale të drejtuara: Finalja e Champions League 2024 dhe finalja e Europa League 2022

KARTONI I PARË – Përpara këtij Botërori, Vinčić kishte drejtuar gjithsej 11 ndeshje në Kupat e Botës dhe Kampionatet Europiane pa nxjerrë asnjë karton të kuq.

Seria u ndërpre në sfidën mes Meksikës dhe Ekuadorit, kur ai ndëshkoi me karton të kuq mbrojtësin ekuadorian Piero Hincapié, pasi ky mbuloi gojën gjatë një debati me sulmuesin meksikan Santi Giménez, një veprim që ndalohet nga rregullorja e re e FIFA-s për komunikimin në fushë.

Sa i përket kartonëve të verdhë, arbitri slloven ka një mesatare prej rreth 3 kartonësh për ndeshje në turnetë madhorë, çka e rendit ndër arbitrat që preferojnë të mbajnë nën kontroll lojën pa ndërhyrë shpesh me ndëshkime.

POLEMIKAT – Megjithatë, Vinčić nuk ka qenë gjithmonë larg kritikave. Në çerekfinalen e Champions League mes Bayern Munich dhe Real Madrid, në prill të këtij viti, ai u vu në qendër të debatit pasi përjashtoi Eduardo Camavinga me karton të dytë të verdhë për vonesë në ekzekutimin e një goditjeje dënimi.

Vendimi u kritikua nga ish-arbitri i FIFA-s, Eduardo Iturralde González, i cili deklaroi se, edhe pse rregullorja e lejonte ndëshkimin, në një ndeshje të atij niveli duhej treguar më shumë gjykim dhe sens praktik.

Arbitrat e finales së Kupës së Botës 2026

Arbitër kryesor: Slavko Vinčić (Slloveni)

Asistent i parë: Tomaž Klančnik (Slloveni)

Asistent i dytë: Andraž Kovačič (Slloveni)

Arbitër i katërt: Adham Makhadmeh (Jordani)

Asistent rezervë: Mohammad Alkalaf (Jordani)

Finalja e madhe mes Spanjës dhe Argjentinës do të zhvillohet të dielën në stadiumin MetLife dhe pritet të ndiqet nga qindra miliona tifozë në mbarë botën.