Belgjika e ashpër me FIFA-n pas vendimit të tyre për Balogun: Po shkatërroni Fair Play-n për të shpëtuar SHBA-në

Federata Belge e Futbollit ka bërë të ditur se do të shqyrtojë çdo mundësi për ta kundërshtuar vendimin e FIFA-s, ndërsa si Garcia, ashtu edhe federata, e kanë paraqitur reagimin e tyre si një mbrojtje të vetë futbollit.

“Po e mbrojmë futbollin”

Garcia nuk e fshehu habinë kur u pyet për vendimin e FIFA-s.

“Nuk e dija që në Kupën e Botës, data 5 korrik është në fakt 1 prilli. Është si Dita e Gënjeshtrave”, tha ai në konferencën për shtyp para ndeshjes.

Trajneri belg theksoi se kundërshtimi i tyre nuk lidhet vetëm me përballjen ndaj SHBA-së, por me nevojën që FIFA t’i respektojë rregullat dhe standardet e veta.

“Ne nuk po e mbrojmë vetëm kombëtaren apo federatën tonë”, tha Garcia. “Ne po e mbrojmë futbollin.”

Reagimi i plotë i Belgjikës

Federata Mbretërore e Futbollit të Belgjikës u shpreh e habitur nga vendimi i FIFA-s për ta lejuar Folarin Balogun të paraqitet në ndeshjen SHBA–Belgjikë, që zhvillohet të hënën, më 6 korrik, në orën 17:00 sipas kohës lokale në Seattle.

Sipas federatës belge, FIFA e ka bazuar vendimin në nenin 27 të Kodit Disiplinor, i cili i lejon Komisionit Disiplinor të pezullojë zbatimin e një sanksioni të dhënë më parë.

Megjithatë, Belgjika thekson se neni 66.4 i të njëjtit Kod Disiplinor përcakton qartë se një karton i kuq sjell automatikisht pezullim për ndeshjen e ardhshme të skuadrës. Sipas RBFA-së, kjo ka qenë praktika për të gjithë kartonët e kuq të dhënë më herët gjatë këtij Botërori.

Federata belge shton se vendimi bie gjithashtu në kundërshtim të drejtpërdrejtë me Rregulloren e Garës së Kupës së Botës 2026, konkretisht me nenin 10.5, ku thuhet se nëse një lojtar apo zyrtar ekipi përjashtohet me karton të kuq direkt ose indirekt, ai pezullohet automatikisht për ndeshjen pasuese të ekipit të tij, ndërsa mund të shqiptohen edhe sanksione shtesë.

Sipas Belgjikës, natyra automatike e këtij pezullimi është riafirmuar edhe në qarkoren numër 16 të FIFA-s për Kupën e Botës 2026, e shpërndarë te të gjitha federatat pjesëmarrëse më 12 maj 2026.

E njëjta rregull, sipas RBFA-së, përsëritet në çdo takim koordinues para ndeshjeve të Botërorit dhe përfshihet në të gjitha prezantimet zyrtare të punëtorive të FIFA-s për këtë turne.

“Në mënyrë që të mbrohen të drejtat legjitime të të gjitha skuadrave pjesëmarrëse dhe parimet themelore të fair-play-t në sportin tonë, si në këtë Kupë të Botës ashtu edhe në edicionet e ardhshme, RBFA po shqyrton të gjitha opsionet e mundshme”, thuhet në reagimin e federatës belge.

Courtois: Do të jemi gati

Në konferencë ishte i pranishëm edhe portieri i Belgjikës, Thibaut Courtois, i cili pranoi se do të kishte qenë më mirë nëse FIFA do ta kishte marrë këtë vendim më herët.

“Sikur të ishte bërë më herët, ndoshta do të kishim qenë më të përgatitur edhe mendërisht”, tha Courtois. “Është mirë që kemi edhe një stërvitje tjetër të dielën.”

Megjithatë, portieri i Real Madridit theksoi se Belgjika nuk do të kërkojë justifikime.

“Do të jemi gati. Do të dalim në fushë. Ata kanë 11 lojtarë, jo vetëm Balogun”, shtoi ai.

Çfarë vjen më pas?

Përballja mes Shteteve të Bashkuara dhe Belgjikës në 1/8 e finales nis në orën 20:00 sipas kohës lindore amerikane.

Një fitore do ta dërgonte Belgjikën në çerekfinale për herë të parë që nga viti 2018, ndërsa SHBA-ja synon të arrijë në tetëshen më të mirë të Botërorit për herë të parë që nga viti 2002.