Saibari pranë Bayernit

Futbollisti i Kombëtares së Marokut ishte një nga lojtarët më të spikatur të sezonit të kaluar në Eredivisie dhe tani pritet të kryejë vizitat mjekësore para zyrtarizimit të marrëveshjes.

Rekord historik për PSV-në

Transferimi prej 55 milionë eurosh do të hyjë në histori si shitja më e shtrenjtë që PSV Eindhoven ka realizuar ndonjëherë.

25-vjeçari ka tërhequr vëmendjen e klubeve më të mëdha europiane falë paraqitjeve të shkëlqyera gjatë vitit të fundit, por Bayerni ka vepruar më shpejt se rivalët për të siguruar firmën e tij.

Sipas mediave holandeze, Saibari ka arritur marrëveshje për një kontratë afatgjatë që do ta mbajë në “Allianz Arena” deri në verën e vitit 2031.

Vizitat mjekësore gjatë Botërorit

Megjithëse aktualisht ndodhet me Kombëtaren e Marokut në Kupën e Botës 2026, transferimi nuk pritet të hasë pengesa.

Saibari tërhoqi vëmendje edhe në skenën botërore, pasi realizoi një gol spektakolar në barazimin 1-1 ndaj Brazilit.

Sipas gazetarit të njohur Fabrizio Romano, vizitat mjekësore do të zhvillohen në Shtetet e Bashkuara, aty ku po zhvillohet Botërori.

Kjo është bërë e mundur pasi mjeku i Bayernit ndodhet aktualisht me Kombëtaren e Gjermanisë dhe mund të kryejë procedurat pa qenë nevoja që lojtari të udhëtojë drejt Mynihut.

Mbështetje nga bashkëlojtari i Marokut

Lajmet për transferimin janë mirëpritur edhe nga bashkëlojtari i tij te Maroku, Bilal El Khannouss.

Mesfushori i Stuttgartit e cilësoi Saibarin si një futbollist që e meriton plotësisht kalimin te një klub i madh si Bayern Munich.

“Është një mik shumë i afërt i imi. Nuk përzihem në vendimet e karrierës së tij, por shpresoj që transferimi të realizohet sepse ai e meriton. Është një lojtar i jashtëzakonshëm dhe ka cilësitë për të luajtur në Bundesliga”, deklaroi El Khannouss.

Statistika mbresëlënëse

Gjatë periudhës së tij te PSV Eindhoven, Saibari zhvilloi 142 ndeshje zyrtare.

Në këto paraqitje ai realizoi 42 gola dhe kontribuoi me 29 asistime, duke u bërë një nga lojtarët më të rëndësishëm të skuadrës holandeze.

Përveç statistikave individuale, ai ka pasur sukses edhe në aspektin kolektiv, duke fituar tre tituj radhazi kampion në Holandë dhe dy trofe të Kupës së Holandës.

Fokus te Maroku

Pavarësisht se e ardhmja e tij duket tashmë e përcaktuar, Saibari mbetet i përqendruar te Kombëtarja e Marokut.

Skuadra afrikane do të përballet me Skocinë në ndeshjen e dytë të Grupit C më 19 qershor, me synimin për të siguruar fitoren e parë në Kupën e Botës 2026.

Nëse gjithçka shkon sipas planit, pas përfundimit të turneut, Saibari do të nisë kapitullin e ri të karrierës së tij me fanellën e Bayern Munichut. / Periskopi/