9 minuta më parë“Frustrimi për bllokadën politike po rritet”, mediat e huaja raportojnë për zgjedhjet në Kosovë
Periskopi(një orë më parë)
(një orë më parë)Zgjedhjet e shpeshta e bllokada politike në Kosovë është vënë në pah edhe në mediat ndërkombëtare.
“Qytetarët e Kosovës iu drejtuan kutive të votimit për zgjedhjet parlamentare të dielën (7 qershor), të tretat në vetëm 18 muaj, pasi asnjë parti nuk ka arritur të fitojë një shumicë mjaftueshëm të fortë për ta nxjerrë vendin ballkanik nga një krizë politike”, shkruan Reuters.
Kosova voton sërish në zgjedhje të parakohshme, ndërsa rritet pakënaqësia ndaj ngërçit politik
Mediumi francez “Radio France Internationale (RFI)” shkruan se zgjedhjet në Kosovë vijnë vjen pas dështimit të parlamentit të polarizuar të Kosovës për të zgjedhur një president në prill, një ngërç që thelloi krizën politike që ka përfshirë vendin që nga zgjedhjet parlamentare që ishin pa rezultat të qartë të shkurtit 2025.
Partia e kryeministrit Albin Kurti, Vetevendosje, doli e para në zgjedhjet e shkurtit të vitit të kaluar, por nuk arriti të siguronte shumicën e nevojshme për të formuar qeverinë, duke shkaktuar muaj të tërë përçarjesh të ashpra mes deputetëve dhe duke çuar përfundimisht në zgjedhje të parakohshme në dhjetor.
“Vetëvendosje – e cila ndërthur një program të majtë politik me nacionalizëm të fortë – doli sërish e para dhe formoi qeverinë së bashku me deputetët e pakicave etnike. Megjithatë, bojkoti i opozitës ndaj votimit për zëvendësimin e presidentit në largim çoi përfundimisht në rrëzimin e parlamentit”, raporton ky medium.
Disa votues druhen se zgjedhjet e së dielës thjesht do të prodhojnë të njëjtin raport forcash politike.
“Nuk besoj se do të votoj. Është zhgënjyese të shohësh se zgjedhjet do të japin të njëjtin rezultat,” tha për AFP para zgjedhjeve programuesja kompjuterike Miranda Fazliu.
“Zgjedhjet në Kosovë: Votuesit e zhgënjyer u drejtohen sërish kutive të votimit mes ngërçit politik”, thotë titulli i Euronews.
Vendi më i ri i Europës është përballur me pakënaqësi gjithnjë e më të madhe të publikut që nga zgjedhjet e shkurtit 2025, të cilat nuk prodhuan një shumicë apo rezultat të qartë, raporton Euronews.
Qendrat e votimit u hapën të dielën në mëngjes në Kosovë, ndërsa vendi i Ballkanit Perëndimor po mban një tjetër palë zgjedhje të parakohshme — votimin e tretë parlamentar në pak më shumë se një vit. Pakënaqësia e qytetarëve është shtuar për shkak të ngërçit të vazhdueshëm politik dhe bllokimit të proceseve institucionale, vazhdon raportimi./ Periskopi/
