Liverpooli do t’ia paguajë familjes së Jotas kontratën e tij të plotë

Bota e futbollit ende është e tronditur nga humbja e papritur dhe tragjike e Diogo Jotas dhe vëllait të tij, Andre Silva. Dy vëllezërit lanë pas një boshllëk që vështirë se mund të mbushet ndonjëherë.

Jota humbi jetën në një aksident trafiku të enjten, bashkë me Andrenë. Të shtunën në mëngjes, në qytetin e tyre të lindjes Gondomar, u mbajt ceremonia mortore, ku Liverpooli dërgoi një delegacion të përbërë nga drejtues, lojtarë dhe trajnerë për të nderuar kujtimin e tyre, transmeton Klankosova.tv.

Shumë nga shokët e skuadrës së Jotas, përfshirë Virgil van Dijk, Andrew Robertson dhe Alexis Mac Allister, udhëtuan drejt Portugalisë për të qëndruar pranë familjes së tij në këtë moment të dhimbshëm. Ata u bashkuan me stafin e klubit dhe trajnerët e mëparshëm për t’i bërë homazhe Jotas dhe vëllait të tij më të vogël.

Jashtë stadiumit “Anfield”, mijëra tifozë u mblodhën për të vendosur lule, shalle dhe mesazhe prekëse në nderim të kujtimit të Jotas. Kontributi i tij në fushë ishte i paçmueshëm, sidomos sezonin e kaluar kur ndihmoi Liverpoolin të fitonte titullin e 20 Premier League me energjinë e tij të palodhur dhe golat vendimtarë.

Sipas raportimeve nga media portugeze “Record”, Liverpooli ka marrë një vendim prekës në pasojat e kësaj tragjedie: klubi do ta nderojë tërësisht kontratën e Diogo Jotas, duke ia paguar të plotë familjes së tij. Kontrata e sulmuesit ishte e vlefshme deri në vitin 2027 para se të ndodhte aksidenti fatal.

Vendimi është marrë menjëherë nga pronarët e klubit, Fenway Sports Group (FSG), si një garanci që bashkëshortja e Jotas, Rute Cardoso, dhe tre fëmijët e tyre të vegjël do të kenë mbështetje financiare në këtë periudhë të paimagjinueshme zie.

Ky veprim siguron që trashëgimia e Jotas të nderohet jo vetëm në fushë, por edhe jashtë saj, teksa bota e futbollit vazhdon të pikëllohet për humbjen e tij të parakohshme. /Periskopi/