Veç një propagandë, Serbia nuk tërhiqet nga Euro 2024

Federata serbe e futbollit reagoi pas ndeshjes Shqipëri – Kroaci, lidhur me thirrjet e dy tifozerive dhe kërcënoi me largim nga Euro 2024.

Kjo nxiti reagimin e UEFA-s që tashmë ka nisur një hetim për atë ndeshje.

E tani, federata serbe ka bërë të ditur se nuk do të largohen nga Evropiani.

“Ne presim sanksione të ashpra nga UEFA për këto shkelje, megjithatë, tërheqja e Serbisë nga turneu nuk është më problem. Ishte vetëm një reagim fillestar emocional. Por ne thjesht nuk mund ta tolerojmë këtë lloj sjelljeje. Por ne mendojmë se UEFA do të reagojë për këtë çështje së shpejti”, tha sekretari i federatës serbe të futbollit, Jovan Surbatovic.

Serbët u ankuan, megjithatë tifozët e tyre vazhdimisht bënë thirrje ndaj shqiptarëve. Në ndeshjen ndaj Anglisë, ata shfaqën hartën e Kosovës me flamurin e Serbisë në të si dhe pankartat me mbishkrimin: Nuk ka dorëzim.

Gjithashtu, dje para ndeshjes me Slloveninë, tifozët serbë në qendër të Mynihut bënin thirrje: Kosova është zemra e Serbisë.

Për të dyja këto raste, Federata e Futbollit e Kosovës ka dërguar ankesë në UEFA. Serbia u dënua me 10 mijë euro për thirrjet raciste në ndeshjen ndaj Anglisë dhe mbetet të shihet se a do të pasojnë dënimet e tjera.