Zëdhënësi i Prokurorisë Speciale: Nëse do të kishte aktakuzë për Martin Berishajn do të kishim njoftuar

Zëdhënësi i Prokurorisë Speciale, Ekrem Lutfiu, në një paraqitje para gazetarëve është pyetur për intervistimin e ambasorit, Martin Berishaj, megjithatë ai është shfaqur tejet i rezervuar për të dhënë përgjigje në pyetjet e gazetarëve, shkruan Express.

“Kërkoj ndjese për mos ofrimin e informatave. As unë nuk jam i informuar dhe nuk e di se çfarë është t’u ndodhë dhe nuk e di a është duke u intervistuar dikush”, ka thënë Lutfiu, i cili për rol primar ka dhënien e informacioneve për mediat.

Në insistimin e gazetarëve, nëse ambasadori Berishaj është liruar, Lutfiu ka thënë se s’ka informacione që mund t’i ndajë me mediat.

“Nuk kam informata, kërkoj ndjesë, por s’kam informata që mund t’i ndajë me ju”, ka shtuar tutje ai.

Sa i përket asaj nëse është ngritur aktakuzë, Lutfi ka thënë se përdërisa s’kanë njoftuar, i bie që s’ka aktakuzë.

“Nëse do të kishte aktakuzë, do t’iu kishim informuar, si zakonisht që informojmë, përderisa s’ka , s’e kemi informu”, ka përfunduar ai.