Presidenti Joe Biden i dërgon letër Faton Bislimit

Ish-anëtari i kryesisë së LDK-së, ka njoftuar se ka pranuar një letër nga presidenti i SHBA-ve Joe Biden, në prag të 25 vjetorit të intervenimit të NATO-s për çlirimin e Kosovës nga Serbia, shkruan Periskopi.

Ai përmes një postimi në Facebook ka publikuar letrën e dërguar nga presidenti Biden në të cilën thuhet:

“Ju falëmnderit që ndatë mendimet tuaja me mua. Të dëgjoj nga njerzë pasionantë si ju më inspiron mua dhe më jep kënaqësinë për t’ju përgjigjur”.

Postimi i plotë:

Në prag të 25 vjetorit të intervenimit të NATO-s për çlirimin e Kosovës nga marshi gjenocidal serb kundër popullit tonë, jam jashtëzakonisht i nderuar të kem pranuar këtë letër nga Presidenti i SHBA-ve Joe Biden, një mik dhe përkrahës historik i kauzës sonë të drejtë për liri e pavarësi.

“Ju falëmnderit që ndatë mendimet tuaja me mua. Të dëgjoj nga njerzë pasionantë si ju më inspiron mua dhe më jep kënaqësinë për t’ju përgjigjur,” shkruan Presidenti në letrën e tij. “Gjerësa sfidat para nesh janë ndër më të vështirat në histori, unë kurrë s’kam qenë më optimist për të ardhmen e Amerikës… Ne mund të kthejmë krizën në mundësi, dhe besoj se Amerika është më mirë e pozicionuar se çdo vend tjetër në botë për të na udhëheq në shekullin e 21…” shkruan, ndër të tjera, Presidenti Biden.

Letra e tij vije si pergjigje ndaj letrës sime të fillim-shkurtit 2024 përmes së cilës kisha shpreh mirënjohjen më të përzemërt për Presidentin Biden nën lidershipin e së cilit (asokohe si Senator) bashkë me kolegun dhe mikun e tij Republikan (tanimë i ndjerë) McCain (po ashtu një përkrahës yni i madh), SHBA kishte marrë vendimin për të udhëhequr fushatën bombarduese të NATO-s kundër Serbisë. Në letrën time, po ashtu, kisha potencuar interesin sublim të Kosovës, në linjë me interesat gjeopolitike Amerikane në rajon, për anëtarësim në NATO.

Partneriteti ynë unik me SHBA-të është themeltar për të ardhmen tonë si shtet e si komb, sikur që ishte gurthemel i lirisë e pavarësisë së Kosovës.

Në vend të një letre të tretë, uroj që me Presidentin Biden të kemi një shtrëngim duarsh, përsëri, së shpejti!

Kosova edhe sot e përmot ka nevojë për SHBA-të! Andaj, puna jonë vazhdon…

🇺🇲 🇽🇰 🇦🇱 🇺🇲 🤝