Kjo është agjenda e vizitës së sekretarit amerikan Antony Blinken gjatë vizitës në Tiranë

Sekretari amerikan i Shtetit, Antony Blinken, do të jetë për vizitë në Tiranë, ku pritet të takohet me kryeministrin e atjeshëm, Edi Ramën dhe kreun e SPAK-ut, Altin Dumanin.

Vizita e Blinkenit në Tiranë do të jetë disa orëshe, ku më pas i njëjti do të niset për në Munich të Gjermanisë, për të marrë pjesë në Konferencën e Sigurisë, shkruan Euronews.al.

Pas takimit mes Ramës e Blinkenit, mund të ketë edhe një konferencë për shtyp, por që kjo ende nuk është konfirmuar.

Për Shtetet e Bashkuara të Amerikës, reforma në drejtësi dhe lufta kundër korrupsionit është prioritet, e për këtë një takim Sekretari amerikan i Shtetit do të zhvillojë një takim edhe me drejtuesin e SPAK, Altin Dumani.

Gjatë qëndrimit në Tiranë sekretari Blinken pritet të takohet edhe me stafin e ambasadës amerikane.

Ardhja në Tiranë për disa orë e Antony Blinken do të shoqërohet edhe me masa të rrepta sigurie nga Policia e Shtetit, ku pritet të ketë disa kufizime në segmentet nga aeroporti i Rinasit në drejtim të kryeqytetit, por edhe brenda Tiranës aty ku Blinken do të lëviz për të zhvilluar takimet.

Antony Blinken do të bëhet Sekretari i gjashtë amerikan i Shtetit që vjen në Shqipëri për një vizitë zyrtare.