Të premten zgjatet sheshi deri te rrethi i flamurit

Siç bëhet e ditur në një njoftim në Facebook, rruga “Dëshmorët e Kombit” do të jetë e mbyllur për qarkullim të veturave nga ora 10 deri në 15.

Qytetarët mund të marrin me qira, pa pagesë, njërën nga 160 biçikletat dhe 60 trotinetët për qarkullim në këtë rrugë, ka njoftuar Komuna.

“Të premten, më 22 shtator nga ora 10:00 në Prishtinë do të organizohet aktiviteti “Dita pa makina”, një ngjarje ndërkombëtare, e cila organizohet në 2000 qytete të Botës, dhe që ka për qëllim inkurajimin e qytetarëve që t’i përdorin sa më pak makinat për transport, e në vend të tyre të shfrytëzojnë transportin publik apo biçikletat. Me rastin e organizimit të këtij aktiviteti, të premten, nga ora 10:00 deri në 15:00, vetëm rruga ‘Dëshmorët e Kombit’, do të jetë e mbyllur për qarkullimin e veturave”, thuhet në njoftim.

Ky njoftim i Komunës është në kundërshtim me deklaratat që drejtori i Shërbimeve publike në kryeqytet, Ilirik Musliu, ka dhënë të mërkurën në emisionin “Sot” në KTV.

Ai ka deklaruar se më 22 shtator për dy orë, prej orës 11:00 deri në orën 13:00, rrugët ‘Agim Ramdani’, ‘UÇK’, ‘Eqrem Qabej’ e ‘Luan Haradinaj’, “pra unaza kryesore e kryeqytetit do të jetë pa makina”.

“Prej orës 11:00 deri në orën 13:00 do të jemi pa makina në rrugët kryesore, rrugën ‘Agim Ramdani’, ‘UÇK’, ‘Eqrem Qabej’, ‘Luan Haradinaj’, pra unaza kryesore e kryeqytetit do të jetë pa makina prej orës 11:00 deri në 13:00”, është shprehur Musliu.