Osmani niset për në New York, do të takohet me liderë botërorë e do të marrë pjesë në pritjen e organizuar nga Biden

Presidentja Vjosa Osmani ka udhëtuar për në New York, ku pritet të takohet me liderë botërorë e përfaqësues të organizatave ndërkombëtare në kuadër të javës së Asamblesë së Përgjithshme të Kombeve të Bashkuara.

“Presidentja është ftuar së bashku  me Zotërinë e Parë, Prindon Sadriu, që të marrin pjesë në pritjen zyrtare të organizuar nga presidenti i SHBA-ve, Joe Biden”, njoftoi Presidenca.

Edhe Zotëria i Parë, “gjithashtu është ftuar të marrë pjesë në një pritje të veçantë, të organizuar nga Zonja e Parë e SHBA-ve, Jill Biden”, siç njofton Presidenca.

Përgjatë kësaj vizite, Osmani në takime me homologët e saj pritet të flasë për “zhvillimet e fundit në Kosovë, sikurse edhe për synimet e Kosovës për krijimin e raporteve me shtetet anëtare të OKB-së dhe anëtarësim në organizata ndërkombëtare”. Ajo, siç njofton Presidenca, poashtu do të marrë pjesë edhe në aktivitete e diskutime të shumta të organizuara nga shtetet aleate.

“Përveç takimeve, Presidentja do të mbajë diskutime në disa nga universitetet dhe institucionet më prestigjioze në SHBA”, thuhet në njoftim.

Në agjendën e Osmanit janë edhe disa aktivitete të përbashkëta me mërgatën shqiptare në Amerikë si dhe disa nga shoqatat të cilat e zhvillojnë aktivitet në SHBA.